“Миллий терма жамоани танқид эмас, қўллаб-қувватлаш керак” — Шавкат Мирзиёев
Давлат раҳбари футболни ривожлантириш, инвестицияларни кўпайтириш ва болалар футболига алоҳида эътибор қаратилишини маълум қилди.
Президент Шавкат Мирзиёев ёшлар билан учрашувда Ўзбекистон миллий футбол терма жамоасининг ФИФА Жаҳон чемпионатидаги иштирокига алоҳида тўхталиб, футболчиларни қўллаб-қувватлаш муҳимлигини таъкидлади.
Давлат раҳбари қайд этганидек, миллий терма жамоанинг АҚШ ва Мексика майдонларидаги ўйинларини бутун халқ катта ҳаяжон билан кузатди. Давлат раҳбарининг сўзларига кўра, ФИФА рейтингида юқори ўринларни эгаллаб турган Португалия, Колумбия ҳамда таркибида Европанинг етакчи клубларида тўп сураётган футболчилар жамланган Конго терма жамоаларига қарши учрашувлар футболчилар учун муҳим тажриба мактаби бўлди.
Президент Аббос Файзуллаев ва Элдор Шомуродовнинг Жаҳон чемпионатидаги илк голлари халқимизга катта қувонч бағишлаганини алоҳида эътироф этди.
Давлат раҳбари миллий терма жамоанинг мундиалдаги иштироки юзасидан турли фикрлар билдирилаётганига тўхталар экан, Ватан шарафини ҳимоя қилган футболчиларга ортиқча эътироз билдириш ва улардан айб излаш халқимизга хос эмаслигини таъкидлади.
“Аксинча, бугун уларни қўллаб-қувватлаш, руҳини кўтариш ҳар қачонгидан ҳам муҳим”, — деди Президент.
Шунингдек, катта ғалабалар ҳали олдинда экани, бунинг учун футбол инфратузилмасини ривожлантириш, соҳага инвестицияларни кўпайтириш ва болалар футболига алоҳида эътибор қаратиш зарурлиги қайд этилди. Таъкидланишича, болалар футболи умуммиллий ҳаракатга айлантирилади.
Президент келаси йил январ ойида Саудия Арабистонида бўлиб ўтадиган футбол бўйича Осиё кубогига тайёргарлик ишлари ҳозирданоқ бошланишини маълум қилди.
Сўнгида давлат раҳбари: “Биз жамоамизга ишонамиз ва ушбу мусобақада ҳам бутун халқимиз билан қўллаб-қувватлаймиз!” дея таъкидлади.
