Покистонда ўқув маркази томи қулаши оқибатида 14 нафар бола ҳалок бўлди
Покистон Президенти ҳалок бўлганларнинг яқинларига ҳамдардлик билдириб, жароҳатланганларнинг тезроқ соғайишини тилади.
Покистоннинг шарқидаги Лаҳор шаҳрида қурилиши давом этаётган хусусий ўқув маркази биноси томи қулаши оқибатида камида 14 нафар мактаб ўқувчиси ҳалок бўлди. Яна саккиз нафар бола турли даражада тан жароҳати олиб, шифохонага ётқизилган. Бу ҳақда AP хабар берди.
Полиция маълумотига кўра, қутқарувчилар вайроналар остида қолганларни қидириш ишларини давом эттирмоқда. Дастлабки маълумотларда яна бир неча бола вайроналар остида бўлиши мумкинлиги айтилган.
Ҳуқуқ-тартибот идоралари ҳодиса юзасидан ўқув маркази эгаси ва яна бир кишини қўлга олган. Терговнинг дастлабки хулосаларига кўра, ўқув маркази эски бинода фаолият юритган, қурилиши якунланмаган иккинчи қават томи эса сифатсиз қурилиш ишлари сабаб қулаган бўлиши мумкин.
Покистон Президенти Осиф Али Зардорий ҳалок бўлганларнинг яқинларига ҳамдардлик билдириб, жароҳатланганларнинг тезроқ соғайишини тилади. У, шунингдек, бундай фожиаларнинг олдини олиш учун қурилиш хавфсизлиги талабларига қатъий риоя этиш зарурлигини таъкидлади.
Покистонда қурилиш меъёрларига риоя этилмаслиги, сифатсиз қурилиш материалларидан фойдаланиш ва хавфсизлик қоидаларининг бузилиши сабаб бинолар қулаши билан боғлиқ ҳодисалар вақти-вақти билан содир бўлиб туради.
