Тошкентда Марказий Осиё экология ва атроф-муҳит тадқиқотлари маркази очилади
Марказий Осиё ва Хитой экология йўналишидаги илмий ҳамкорликни кучайтирмоқда.
Ўзбекистон Президентининг экология масалалари бўйича маслаҳатчиси, Экология ва иқлим ўзгариши миллий қўмитаси раиси Азиз Абдуҳакимов бошчилигидаги делегация Хитойнинг Урумчи шаҳрида бўлиб ўтган Хитой ва Марказий Осиё мамлакатлари давлат илмий-тадқиқот муассасалари раҳбарларининг мулоқот механизми биринчи йиғилишида иштирок этди. Бу ҳақда Экология ва иқлим ўзгариши миллий қўмитаси матбуот хизмати хабар берди.
Тадбирнинг очилишида Хитой фанлар академияси вице-президенти ҲE Ҳонгпинг ва Шинжон экология ва география институти бош директори Чжан Юанмин сўзга чиқди.
Тадбирда минтақа давлатлари ўртасида илмий ҳамкорликни ривожлантириш, тадқиқот натижалари ва сунъий йўлдош маълумотлари алмашинувини йўлга қўйиш, шунингдек, атроф-муҳитни муҳофаза қилиш, ерлар деградацияси, чўлланиш ҳамда тупроқ шўрланишига қарши курашиш бўйича қўшма лойиҳаларни амалга ошириш масалалари муҳокама қилинди.
Йиғилиш иштирокчилари мазкур мулоқот механизми 2025 йил июнь ойида Остона шаҳрида ўтказилган "Марказий Осиё – Хитой" иккинчи саммитида эришилган келишувларнинг амалий натижаси эканини таъкидладилар.
Хитой томони Ўзбекистонда амалга оширилаётган экологик сиёсат ва «яшил» ривожланиш йўналишидаги ислоҳотларни юқори баҳолаб, мамлакатда атроф-муҳитни муҳофаза қилиш ҳамда иссиқхона газлари чиқиндиларини камайтириш борасида изчил ишлар олиб борилаётганини қайд этди.
Шунингдек, Шинжон экология ва география институти кўмагида Тошкент шаҳридаги "Green University" базасида Марказий Осиё экология ва атроф-муҳит тадқиқотлари марказини ташкил этиш муҳим қадам сифатида эътироф этилди. Қайд этилишича, ушбу марказ икки мамлакат ўртасидаги илмий ҳамкорликни янада мустаҳкамлаш, экологик ва иқлимий муаммолар бўйича замонавий илмий платформани шакллантиришга хизмат қилади.
