“Ёшлар билан боғлиқ барча масалалар ҳал бўлди, деб бўлмайди” — Шавкат Мирзиёев

 

Президент Шавкат Мирзиёев Ёшлар куни муносабати билан ўтказилаётган учрашувда мамлакатимиз ёшларини байрам билан самимий табриклаб, ёшларни ҳар томонлама қўллаб-қувватлаш давлат сиёсатининг устувор йўналишларидан бири бўлиб қолишини таъкидлади.

 

Қайд этилишича, бугунги кунда мамлакатнинг ҳар бир маҳалласида ёшлар ташаббусларини қўллаб-қувватлайдиган ёшлар етакчилари фаолияти йўлга қўйилган. Шунингдек, ҳар ҳафтанинг пайшанба куни “Ёшлар куни” деб эълон қилиниб, вазирлик ва идоралар ҳамда маҳаллий ҳокимликлар ёшлар муаммоларини ўрганиш ва уларни ҳал этишга сафарбар этилган.

 

Президентнинг таъкидлашича, амалга оширилган ислоҳотлар натижасида ёшлар билан ишлаш тизими тубдан янгиланди. Хусусан, “Ёшлар дафтари” орқали билим олиш, касб-ҳунар эгаллаш, хорижий тилларни ўрганиш, ишга жойлашиш ва тадбиркорлик фаолиятини бошлашда қийинчиликка дуч келган 1,5 миллион нафар ёшнинг муаммолари ҳал этилди.

 

Шунингдек, ёш тадбиркорлар сони беш баробарга ошиб, 287 минг нафардан ортди. Ўқув марказлари фаолияти учун яратилган қулай шароитлар натижасида хорижий тилларни интенсив ўрганаётган ёшлар сони 3,5 миллион нафарга етди.

 

Президент ёшларнинг халқаро майдондаги ютуқларига ҳам алоҳида тўхталиб, ўқувчи ва талабалар нуфузли фан олимпиадаларида 434 та, ёш спортчилар эса халқаро мусобақаларда 2 минг 245 та медални қўлга киритганини қайд этди.

 

Бундан ташқари, тарбияси оғир ёшлар билан манзилли ишлаш тизими жорий этилгани натижасида сўнгги икки йил ичида ёшлар жиноятчилиги 2,5 баробарга камайгани таъкидланди.

 

Шу билан бирга, давлат раҳбари бу натижалар ёшлар билан боғлиқ барча масалалар тўлиқ ҳал этилганини англатмаслигини қайд этди. У ёшлар масалалари учун масъул вазирлик ва идоралар, ҳокимлар, олий таълим муассасалари ректорлари, техникум ва мактаб раҳбарлари ёшларнинг муаммолари, эҳтиёжлари ва қизиқишларини доимий ўрганиб, улар билан тизимли ишлаши зарурлигини таъкидлади.