Ўзбекистонда касбларга ўқитадиган “Келажак билимлари экотизими” йўлга қўйилади

 

Президент Шавкат Мирзиёев ёшлар билан учрашувда мамлакатда замонавий билим, касб ва технологияларни эгаллаган ёшлар сафини кенгайтиришга қаратилган янги ташаббусларни эълон қилди.

 

Давлат раҳбари бугунги муваффақият ва эртанги тараққиётнинг пойдевори учта асосий устунга – билим, касб ва технологияга таянишини таъкидлади.

 

Шу мақсадда ҳар йили 500 минг нафар ёшни замонавий касбларга ўқитишга хизмат қиладиган “Келажак билимлари экотизими” йўлга қўйилади.

 

Ҳудудларда ўқув марказлари ташкил этиш истагидаги ёшларга давлат томонидан кенг кўламли имтиёзлар яратилади. Хусусан, ўқув марказлари қуриш учун ер майдонлари ва давлат объектлари имтиёзли нархларда аукцион орқали тақдим этилади. Тўловларни беш йил давомида фоизсиз бўлиб-бўлиб амалга ошириш имконияти яратилади, зарур инфратузилма эса давлат ҳисобидан барпо этилади.

 

Бундан ташқари, ўқув марказларини қуриш ва замонавий жиҳозлаш учун ажратиладиган кредитларнинг фоиз ставкасининг 7 фоизи давлат томонидан қоплаб берилади. Агар ўқув марказлари хорижнинг илғор таълим дастурлари ва малакали мутахассисларини жалб қилса, ушбу харажатларнинг ярми ҳам давлат томонидан молиялаштирилади.

 

Президент ташаббусига кўра, замонавий касбларни халқаро талаблар асосида эгаллаш истагидаги ёшларга “касб ваучери” жорий этилади. Фоизсиз ссуда шаклида бериладиган ушбу ваучер орқали ҳар йили 50 минг нафар ёшнинг касб ўрганиш харажатлари қопланади.

 

Шунингдек, эҳтиёжманд оилалардаги 85 минг нафар ишсиз ёш хусусий ўқув марказларида касб эгаллаши учун бепул ваучер билан таъминланади. Жорий йилнинг ўзида ушбу дастурларни молиялаштириш учун 120 миллиард сўм ажратилиши, талаб ортиб бориши билан маблағ ҳажми ҳам оширилиши маълум қилинди.

 

Давлат раҳбари хорижий тил сертификатини олган ёшларнинг харажатларини қоплаш амалиёти ўзини оқлаганини қайд этиб, эндиликда ушбу тизимни халқаро касб сертификатларини қўлга киритган ёшларга ҳам татбиқ этиш таклифини илгари сурди.

 

Ёшларни касбга тайёрлашда муҳим ўрин тутадиган техникумлар фаолиятида ҳам хусусий сектор иштироки кенгайтирилади. Бунинг учун хусусий техникумлар очишдаги лицензия талаблари соддалаштирилиб, 20 дан ортиқ ортиқча талаб бекор қилинади. Янги ўқув йилидан бошлаб хусусий техникумларга ҳам касб-ҳунар таълими бўйича давлат грантлари ажратилади.

 

Шунингдек, халқаро касб танловларида ғолиб бўлган давлат ва хусусий техникум ўқувчилари 100 миллион сўм, уларни тайёрлаган устозлар эса 50 миллион сўм миқдорида мукофот билан тақдирланади.