Фарғонада вояга етмаган бола кучук боласини каналга ташлади
Ҳолат юзасидан унинг онаси жаримага тортилди.
Ижтимоий тармоқларда кучук боласига нисбатан шафқатсиз муносабат акс этган видеотасвир юзасидан Фарғона вилояти Экология ва иқлим ўзгариши бош бошқармаси расмий маълумот берди.
Қайд этилишича, ҳолат юзасидан Тошлоқ тумани Экополиция ҳамда туман Ички ишлар бўлими ходимлари томонидан тезкор ўрганиш ишлари олиб борилган.
Ўрганишлар давомида кучук боласини Катта Фарғона каналига ташлаган шахс Тошлоқ тумани Бўстон маҳалласида яшовчи фуқаро И.С. экани аниқланган. Маълум бўлишича, у вояга етмаган шахс ҳисобланади.
Шу муносабат билан амалдаги қонунчиликка мувофиқ, вояга етмаганнинг онаси Ҳ.Н.га нисбатан Маъмурий жавобгарлик тўғрисидаги кодекснинг 47-моддаси 1-қисми асосида базавий ҳисоблаш миқдорининг 5 баравари, яъни 2 миллион 60 минг сўм миқдорида жарима жазоси қўлланилган.
Бундан ташқари, вояга етмаган шахс билан профилактик суҳбат ўтказилиб, бундай ҳолатларнинг такрорланишига йўл қўймаслик юзасидан Тошлоқ тумани ИИБ томонидан назорат ўрнатилган.
