Кореянинг илғор тажрибаси ўрганилмоқда: МБФТИ вакиллари халқаро тренингда
Кореяда “Биологик препаратларни ишлаб чиқиш ва ишлаб чиқариш бўйича кириш курси” халқаро тренинги бўлиб ўтди.
Тиббиёт ва фармацевтика тармоғини ривожлантириш агентлиги кўмагида Миллий биофармацевтика илмий-тадқиқот институти мутахассислари Корея Республикасида ташкил этилган “Биологик препаратларни ишлаб чиқиш ва ишлаб чиқариш бўйича кириш курси” халқаро тренинг дастурида муваффақиятли иштирок этиб, уни якунладилар.
Мазкур тренинг биофармацевтика йўналишида илғор билим ва амалий кўникмаларни мустаҳкамлаш, замонавий ишлаб чиқариш технологияларини ўрганиш ҳамда халқаро тажриба алмашувини кенгайтиришга хизмат қилди.
Тренинг давомида иштирокчилар биологик дори воситаларини яратиш ва ишлаб чиқаришнинг асосий босқичлари, преклиник тадқиқотларни ташкил этиш, сифат назорати тизимлари, инновацион биофарматсевтик ёндашувлар ҳамда Кореянинг ушбу йўналишдаги илғор тажрибалари билан яқиндан танишдилар.
Шунингдек, дастур доирасида Кореянинг етакчи биофармацевтика компаниялари ва илмий-тадқиқот марказларига ташрифлар амалга оширилиб, замонавий лабораториялар фаолияти, ишлаб чиқариш инфратузилмаси, технологик жараёнлар ҳамда биотехнологик стартапларни ривожлантириш механизмлари атрофлича ўрганилди.
Ушбу халқаро тренинг Миллий биофармацевтика илмий-тадқиқот институти илмий салоҳиятини янада ошириш, биофармацевтика йўналишида замонавий инновацияларни жорий этиш ва халқаро ҳамкорлик алоқаларини мустаҳкамлашда муҳим босқич бўлди.
