Малайзияда ҳибсга олинган 3 ўзбекистонликнинг ўлим жазоси бекор қилинган — ТИВ
Ташқи ишлар вазирлиги Малайзияда ўлимга ҳукм қилинган уч нафар ўзбекистонлик ҳақида маълумот берди.
Сўнгги кунларда оммавий ахборот воситалари ва ижтимоий тармоқларда Малайзияга саёҳатга борган уч нафар ўзбекистонликнинг ўлим жазосига ҳукм қилингани ҳақидаги видеоинтервю кенг муҳокамаларга сабаб бўлди.
Мазкур ҳолат юзасидан Ташқи ишлар вазирлиги матбуот котиби Zamon.uz'га расмий маълумот тақдим этди.
Қайд этилишича, 2010 йил сентябрь ойида Ўзбекистон фуқаролари Н.С., Н.Д. ва Ж.Ж. Куала-Лумпур халқаро аэропортида 12 килограммдан ортиқ гиёҳвандлик воситаларини олиб ўтишга уринган вақтида Малайзия ҳуқуқни муҳофаза қилувчи органлари томонидан қўлга олинган.
Кейинчалик Малайзия суди уларнинг ҳар бирига нисбатан ўлим жазоси тайинлаган.
Фуқароларнинг ҳуқуқ ва қонуний манфаатларини ҳимоя қилиш мақсадида Ўзбекистоннинг Малайзиядаги элчихонаси томонидан 2013, 2014, 2016 ва 2020 йилларда Малайзия Ташқи ишлар вазирлиги, Бош прокуратураси, Олий суди ҳамда мамлакат Қиролига уларни афв этиш юзасидан бир неча бор расмий мурожаатлар юборилган.
Маълум қилинишича, 2018 йилда Малайзияда ўлим жазосини ижро этишга мораторий жорий этилган. Шундан сўнг, 2024 йил 18 мартдан кучга кирган "Ўлим ва умрбод озодликдан маҳрум қилиш жазоларини олган шахсларнинг ишларини қайта кўриб чиқиш тўғрисида"ги қонун асосида Малайзия Олий суди мазкур уч нафар Ўзбекистон фуқаросига нисбатан чиқарилган ўлим жазосини 30 йил муддатга озодликдан маҳрум қилиш жазоси билан алмаштирган.
Малайзия қонунчилигига мувофиқ, жазони ижро этиш тартиби ва яхши хулқ-атвор учун бериладиган имтиёзлар ҳисобга олинган ҳолда, ушбу фуқароларнинг жазо муддати 2030 йилда якунланиши кутилмоқда.
Ҳозирда улар Малайзиянинг Селангор штатидаги Кажанг қамоқхонасида жазо муддатини ўтамоқда. Ўзбекистоннинг Малайзиядаги элчихонаси томонидан улар билан мунтазам консуллик учрашувлари ўтказилиб, зарур консуллик-ҳуқуқий ёрдам кўрсатиб келинаётгани билдирилди.
Ташқи ишлар вазирлиги хорижда бўлиб турган Ўзбекистон фуқароларининг ҳуқуқ ва қонуний манфаатларини ҳимоя қилиш бўйича зарур чораларни бундан буён ҳам давом эттиришини маълум қилди.
