Самарқандда ота судга чақирилгач, 25 млн алимент тўлади
Бунгача қарздор алимент маблағларини белгиланган миқдорда эмас, кам-кўст тўлаб келган.
Фуқаролик ишлари бўйича Каттақўрғон туманлараро судининг 2023 йил 8 сентябрдаги суд буйруғига асосан қарздор Х.А.дан ундирувчи Г.А. фойдасига икки нафар фарзандининг моддий таъминоти учун фарзандлари вояга етгунига қадар ҳар ойда иш ҳақи ва бошқа даромадларининг учдан бир қисми миқдорида алимент ундириш белгиланган.
Қарздор алимент маблағларини белгиланган миқдорда эмас, кам-кўст тўлаб келган. Натижада 2026 йил июнь ойига қадар жами 24 миллион 403 минг 614 сўм миқдорида алимент қарздорлиги юзага келган.
Қарздорнинг қарздорликни ихтиёрий равишда қоплашдан бўйин товлаганлиги сабабли, 2026 йил 24 июнь куни унга нисбатан Ўзбекистон Республикаси Маъмурий жавобгарлик тўғрисидаги кодексининг 47-4-моддасига асосан маъмурий ҳуқуқбузарлик тўғрисида баённома расмийлаштирилиб, иш кўриб чиқиш учун Жиноят ишлари бўйича Каттақўрғон шаҳар судига юборилган.
Суд муҳокамаси жараёнида қарздор Х.А. ундирувчи Г.А. фойдасига 25 миллион сўм миқдоридаги алимент маблағини тўлиқ тўлаган. Шу муносабат билан маъмурий иш тарафларнинг ярашуви асосида тугатилган.
