Ўзбекистонда ов қилиш тақиқланган камёб ҳайвонлар рўйхати тасдиқланди
1 августдан айрим камёб ва йўқолиб кетиш хавфи юқори бўлган ёввойи ҳайвонларни овлашга вақтинчалик тақиқ жорий этилади. Чеклов 2028 йил 1 январга қадар амал қилади.
Ўзбекистонда камёб ва йўқолиб кетиш хавфи юқори бўлган айрим ёввойи ҳайвонларни овлашга вақтинчалик тақиқ жорий этилади. Бу ҳукуматнинг 30 июнь куни қабул қилинган тегишли қарорида белгиланди.
Қарорга кўра, тақиқ 2026 йил 1 августдан 2028 йил 1 январгача амал қилади ҳамда ҳукумат қарори иловасида келтирилган ёввойи ҳайвонлар турларига нисбатан татбиқ этилади.
Бунда чеклов фермалар, питомниклар, инкубаторлар, балиқчилик питомниклари ва ҳовуз хўжаликларида сақланаётган ёки етиштирилаётган ёввойи ҳайвонларга, шунингдек, илмий ва тиббий мақсадларда овлаш ҳолатларига нисбатан қўлланилмайди.
Шунингдек, қарор билан ов қилиш тақиқланган камёб ва йўқолиб кетиш хавфи юқори бўлган ёввойи ҳайвонлар учун ов квоталарини ажратиш ҳам тақиқланди.
Ҳужжатда сув биоресурсларини тиклаш бўйича қўшимча чоралар ҳам назарда тутилган. Хусусан, 2026 йил 1 августдан 2030 йил 1 январга қадар республиканинг марказий шаҳарларидан оқиб ўтувчи дарё ва сойларга ҳар йили камида 15 тонна балиқ чавоғи қўйиб юборилади.
Мазкур ишлар Экология ва иқлим ўзгариши миллий қўмитаси ҳамда Фанлар академияси томонидан шакллантириладиган рўйхат асосида амалга оширилади.
Бундан ташқари, Экология ва иқлим ўзгариши миллий қўмитасига ноқонуний ов ва браконерликка қарши назоратни кучайтириш, манфаатдор вазирлик ва идораларга эса қарор ижросини таъминлаш вазифаси юклатилди.
