Қашқадарёда фермерга босим ўтказиб, пул талаб қилган она ва қиз ушланди
Улар фермернинг ер майдонини давлат захирасига ўтказиб юбориш билан қўрқитган.
Ҳуқуқни муҳофаза қилувчи органлар томонидан ўтказилган терговга қадар текширувларда аниқланишича, Китоб туманида яшовчи Д.Э ва унинг онаси Ҳ. А қўшни маҳаллада истиқомат қилувчи фермер Р. О хўжалигига тегишли ер майдонидан лой ғишт қуйиш мақсадида фойдаланиб келаётганини билган.
Улар ушбу ҳолатдан моддий манфаат кўришни кўзлаб, ўзаро жиноий тил бириктириб, фермерга босим ўтказа бошлаган. Гумонланувчилар ер майдони бўйича давлат органларидаги танишлари орқали кадастр идорасига мурожаат қилиб, уни давлат захирасига ўтказиб юборишлари мумкинлигини важ қилиб кўрсатган.
Шунингдек, улар қишлоқ хўжалиги соҳасидаги ваколатли органларга мурожаат қилингани ва мазкур масала юзасидан даъво қилмаслик ҳамда фермернинг тадбиркорлик фаолиятига тўсқинлик қилмаслик эвазига 5 миллион сўм талаб қилган.
Қашқадарё вилояти ИИБ Тезкор-қидирув хизмати ҳамда Уюшган жиноятчиликка қарши курашиш бошқармаси ходимлари томонидан ўтказилган тезкор тадбир давомида Д. Э ва Ҳ. А талаб қилинган пулнинг 3 миллион сўмини олаётган вақтида ашёвий далиллар билан ушланган.
Мазкур ҳолат юзасидан Жиноят кодексининг 165-моддаси 2-қисми «в» банди (товламачилик) билан жиноят иши қўзғатилган. Ҳозирда гумонланувчиларнинг жиноий фаолияти ва эҳтимолий шерикларини аниқлаш юзасидан тергов ҳамда тезкор суриштирув ишлари давом эттирилмоқда.
