АҚШда 16 нафар болани битта хонада даҳшатли шароитда сақлаган тўрт киши ҳибсга олинди
18 ойликдан 18 ёшгача бўлган болаларнинг етти нафари шифохонага ётқизилган.
АҚШнинг Огаё штатида 16 нафар вояга етмаган болани йиллар давомида оғир ва антисанитария шароитида сақлаганликда гумон қилинган тўрт нафар оила аъзоси ҳибсга олинди деб хабар беради Ассосиатед Пресс маҳаллий ҳуқуқни муҳофаза қилиш органларига таяниб.
Маҳаллий ҳуқуқни муҳофаза қилувчи органлар маълумотига кўра, 30 июнь куни Ҳамден қишлоғидаги хонадонлардан бирида ўтказилган тинтув давомида ёши 18 ойликдан 18 ёшгача бўлган 16 нафар бола топилган.
Дастлабки маълумотларга кўра, болалар узоқ вақт давомида антисанитария ҳолатидаги уйда, асосан битта хонада сақланган. Айрим вояга етмаганларнинг соғлиғи оғир аҳволда бўлиб, етти нафари шифохонага ётқизилган, улардан икки нафари вертолёт орқали травматология марказларига етказилган. Яна бир боланинг аҳволи оғирлиги сабабли сунъий нафас олдириш аппаратига уланган.
Тергов давомида болаларнинг мактабга қатнамагани, расмий рўйхатдан ўтказилмагани ҳамда оиладан ташқаридаги деярли ҳеч ким уларнинг мавжудлигидан хабардор бўлмагани аниқланган.
Мазкур ҳолат юзасидан ота-оналар ҳамда бобо-бувилар болалар ҳаёти ва соғлиғига хавф туғдиришда айбланмоқда. Ҳуқуқ-тартибот органлари ушбу иш одам савдоси билан эмас, оиладаги зўравонлик ҳолати билан боғлиқлигини маълум қилган.
Ҳозирда тергов ишлари давом этмоқда. Расмийлар қутқарилган барча болаларни давлат васийлигига олиш чораларини кўрмоқда.
