Покистондаги кучли ёмғирлар оқибатида камида 14 киши ҳалок бўлди
Муссон мавсуми оғир талафотларга сабаб бўлиб, сув тошқини хавфини кучайтирилган.
Покистонда давом этаётган кучли муссон ёғинлари оқибатида камида 14 киши ҳалок бўлди, ўнлаб фуқаролар турли даражадаги тан жароҳатлари олди. Бу ҳақда Dunya News маълум қилди.
Маълумотларга кўра, ноқулай об-ҳаво мамлакатнинг бир қатор ҳудудларида вайронагарчиликларни келтириб чиқарган. Хусусан, Хайбер Пахтунхва вилоятидаги Сайфуллоҳ кўлида сайёҳларни олиб кетаётган қайиқ ағдарилиб, олти киши ҳалок бўлган.
Панжоб ва Атток ҳудудларида турар жой биноларининг деворлари ҳамда томлари қулаши оқибатида бир неча фуқаро ҳаётдан кўз юмган. Шунингдек, айрим ҳудудларда чақмоқ уриши оқибатида ҳам ўлим ҳолатлари қайд этилган.
Ланди Коталда чақмоқ уриши оқибатида икки нафар бола ҳалок бўлган, яна тўрт киши жароҳат олган. Юқори Дир туманида эса момақалдироқ сабаб 20 нафар мадраса талабаси тан жароҳати олган. Жоб ҳудудида том қулаб тушиши оқибатида бир аёл ва бир бола ҳалок бўлган.
Покистон Миллий табиий офатлар бошқаруви бошқармаси Гилгит-Балтистон, Хайбер Пахтунхва ва Азад Кашмир ҳудудларида музлик кўлларининг тошиши ҳамда тўсатдан юз бериши мумкин бўлган сув тошқинлари хавфи юқори эканидан огоҳлантирган.
Маълумот учун, Покистонда ҳар йили июль ойидан бошланадиган муссон мавсуми сентябргача давом этади. Кучли ёғингарчилик қишлоқ хўжалиги учун муҳим аҳамиятга эга бўлсада, кўпинча йирик сув тошқинлари ва бошқа табиий офатларга сабаб бўлади.
