Венесуэладаги зилзилалардан саккиз кун ўтгач, вайроналар остида омон қолган одам топилди
Чили, АҚШ ва бошқа давлатлар қутқарувчилари вайроналар остида қолган эркакни қутқаришга уринмоқда.
Венесуэлада юз берган кучли зилзилалардан саккиз кун ўтганига қарамай, Ла-Гуайра штатида вайроналар остида тирик қолган 43 ёшли эркак топилди. Ҳозирда уни қутқариш бўйича халқаро қутқарув амалиёти давом этмоқда.
Маълум қилинишича, Катия-ла-Мар қирғоқ ҳудудида қоровул бўлиб ишлаган Эрнан Гил зилзила вақтида хизмат биноси вайрон бўлиши оқибатида унинг остида қолиб кетган.
Қутқарув ишларига Чили, АҚШ, Мексика ва яна тўрт давлатдан келган мутахассислар жалб этилган. Чили қутқарувчилари эркакнинг ҳушёр ҳолатда эканини тасдиқловчи видеотасвирларни эълон қилган.
Испаниялик қутқарувчи Луис Артеага Бенатуилнинг маълум қилишича, ҳукумат томонидан жорий этилган чекловлар сабаб ҳудудга кириш мураккаб бўлган. Шунга қарамай, қутқарувчилар асосий мақсад инсон ҳаётини сақлаб қолиш эканини таъкидламоқда.
Сўнгги расмий маълумотларга кўра, Венесуэладаги зилзилалар оқибатида ҳалок бўлганлар сони 2 295 нафарга, жароҳатланганлар эса 11 мингдан ошган. БМТ ҳисоб-китобларига кўра, бедарак йўқолганлар сони қарийб 50 минг кишини ташкил этмоқда.
Шунингдек, вайрон бўлган кўплаб биноларга қидирув ишлари якунланганини билдирувчи махсус белгилар қўйилган бўлса-да, Эрнан Гилнинг тирик экани қутқарувчилар учун умид уйғотмоқда.
