Ўзбекистон ва Грузия қўшма туризм лойиҳаларини амалга оширади
Грузиянинг туризмни ривожлантириш тажрибаси, жумладан, солиқ имтиёзлари ва энотуризм йўналишлари Ўзбекистонда жорий этилиши мумкин.
Ўзбекистон Туризм қўмитаси раиси Абдулазиз Аққулов бошчилигидаги делегациянинг Грузияга расмий ташрифи доирасида Грузия Миллий туризм маъмурияти раҳбари Мая Омиадзе билан учрашув бўлиб ўтди.
Мулоқот давомида томонлар Ўзбекистон ва Грузия ўртасида туризм соҳасидаги ҳамкорликни янада ривожлантириш, ўзаро сайёҳлар оқимини кўпайтириш, қўшма туризм маҳсулотларини яратиш ҳамда уларни халқаро бозорда биргаликда тарғиб этиш масалаларини муҳокама қилди.
Учрашувда туризм статистикасини юритиш бўйича илғор тажрибаларни ўрганиш ҳам кун тартибидан ўрин олган. Хусусан, кириш ва ички туризм статистикасини шакллантириш, аэропортлар ҳамда чегара ўтиш пунктларида сайёҳлар ўртасида танланма сўровлар ўтказиш методологияси юзасидан тажриба алмашиш бўйича ҳамкорликни йўлга қўйиш режалаштирилган.
Томонлар кириш туризмини рағбатлантиришнинг замонавий механизмлари, жумладан, солиқ имтиёзлари орқали туризм бизнесини қўллаб-қувватлаш масалаларини ҳам муҳокама қилди. Ўзбекистон томони Грузияда муваффақиятли қўлланиб келинаётган туроператорлар учун қўшилган қиймат солиғини қайтариш ва ноль ставкани қўллаш амалиётини ўрганишга қизиқиш билдирган.
Шунингдек, тоғ, энотуризм ва гастрономик туризм йўналишларида ҳамкорликни ривожлантириш, экспертлар алмашинувини йўлга қўйиш ҳамда грузиялик мутахассисларни Ўзбекистонда амалга оширилаётган истиқболли лойиҳаларга маслаҳатчи сифатида жалб этиш имкониятлари юзасидан фикр алмашилди.
Музокаралар давомида оммавий ахборот воситалари вакиллари, блогерлар ва жамоатчилик фикри етакчилари учун ўзаро пресс-турлар ташкил этиш, шунингдек, Ўзбекистон ва Грузияда ўтказиладиган йирик халқаро туризм кўргазмалари, форумлар ҳамда бошқа нуфузли тадбирларда мунтазам иштирок этиш бўйича келишувга эришилди.
Учрашув якунида томонлар ўзаро сайёҳлар алмашинувини кўпайтириш, миллий туризм маҳсулотларини халқаро бозорда фаол тарғиб қилиш, қўшма лойиҳаларни амалга ошириш ҳамда узоқ муддатли ва ўзаро манфаатли ҳамкорликни изчил ривожлантириш бўйича амалий ишларни давом эттиришга келишиб олди.
