Покистонда йўловчи автобуси жарликка қулади: камида 40 киши ҳалок бўлди
Яна 8 киши турли даражадаги тан жароҳатлари олган.
Покистоннинг Балужистон вилоятида йўловчи автобуси жарликка қулаши оқибатида камида 40 киши ҳалок бўлди, яна 8 киши турли даражадаги тан жароҳатлари олди.
Dawn газетаси хабарларига кўра, фожиа Балужистон ва Хайбер Пахтунхва вилоятлари чегарасидаги тоғли ҳудудда содир бўлган. Дастлабки маълумотларга кўра, автобус Балужистоннинг Кветта шаҳридан Хайбер Пахтунхва вилоятининг Пешовар шаҳрига йўл олган.
Йўл давомида транспорт воситасига носозлик сабаб бошқа автобусдан йўловчилар ҳам ўтқазилган. Икки вилоят чегарасидан ўтгач, автобус номаълум сабабга кўра бошқарувни йўқотиб, чуқур жарликка қулаган.
Ҳодиса оқибатида камида 40 киши ҳалок бўлгани, 8 нафар жабрланувчи эса шифохонага ётқизилгани маълум қилинган. Воқеа жойига қидирув-қутқарув ҳамда тез тиббий ёрдам бригадалари жалб этилган бўлиб, мураккаб тоғли рельеф қутқарув ишларини қийинлаштирмоқда.
Ҳуқуқни муҳофаза қилувчи органлар йўл-транспорт ҳодисаси сабабларини аниқлаш юзасидан тергов ҳаракатларини бошлаган.
