Россияда айрим заправкаларда амалдорларга бензин навбатсиз берилмоқда
Саратов, Краснодар, Челябинск ва Волгоград вилоятларидаги айрим ёнилғи қуйиш шохобчаларида давлат хизматчиларига навбатсиз ёки хизмат гувоҳномаси асосида бензин сотилаётгани айтилмоқда.
Россиянинг Саратов, Краснодар, Челябинск ва Волгоград вилоятларидаги айрим АЁҚШларда давлат хизматчиларига навбатсиз ёки алоҳида тартибда бензин сотилаётгани ҳақида хабарлар тарқалди, дея маълум қилди Meduza.
Жумладан, Саратовдаги "Роснефт" ёнилғи қуйиш шохобчаларидан бирида фақат хизмат автомобилларига бензин қуйилаётгани айтилмоқда. Бу имтиёздан фавқулодда хизматлар ходимлари билан бир қаторда туман маъмурияти, Давлат хизматлари маркази ва “Россия почтаси” ходимлари ҳам фойдаланган. Шунингдек, мижозлардан бири шунчаки “Ҳукумат” деб айтганидан сўнг унга хизмат кўрсатилган.
Журналистларнинг таъкидлашича, ушбу ёқилғи шохобчасида харидорлардан ҳеч қандай ҳужжат талаб қилинмайди. Шу билан бирга, бу ерда ҳам умумий чеклов амал қилади — бир автомобилга суткасига 30 литрдан ортиқ бензин қуйилмайди.
Краснодарда эса шаҳар думаси депутати Александр Сафронов эълон қилган видеоларда айрим “Роснефт” АЁҚШларида бензин фақат хизмат гувоҳномасини кўрсатган давлат хизматчиларига сотилаётгани акс этган.
Шунингдек, Челябинск–Екатеринбург автомобиль йўлидаги ёнилғи қуйиш шохобчаларидан бирида оддий мижозларга бензин йўқлиги айтилаётгани, бироқ давлат хизматчиларига ёнилғи сотиш давом этаётгани хабар қилинган.
Волгограддаги “Газпром” АЁҚШларидан бирида эса бензин фақат махсус ёнилғи картаси эгалари учун сотилгани маълум қилинган. Бундай картани исталган фуқаро расмийлаштириши мумкин бўлса-да, ундан асосан фавқулодда хизматлар ва маҳаллий маъмурият ходимлари фойдаланаётгани айтилмоқда.
Қайд этилишича, Россияда сўнгги ҳафталарда Украина дронларининг нефть инфратузилмасига ҳужумлари ортидан ёқилғи тақчиллиги кузатилмоқда. Мамлакатнинг кўплаб ҳудудларида бензин сотувига чекловлар жорий этилган ва ҳайдовчилар ёнилғи қуйиш учун узоқ навбатларда туришга мажбур бўлмоқда.
Шу билан бирга, Россия ҳукумати мамлакат ички бозорида бензин тақчиллиги жиддий даражада эмаслигини таъкидламоқда.
