Самарқанд–Ургут темирйўл тармоғи ўтказилган дамба ўпирилиб тушди

“Ўзбекистон темир йўллари” Самарқанд вилоятидаги Самарқанд–Ургут темирйўл участкасига етган зарар юзасидан расмий муносабат билдириб, ҳодисага Зарафшон дарёсида сув оқимининг кескин ошгани сабаб бўлганини маълум қилди.

 

Компания маълумотига кўра, 3 июль куни Самарқанд вилояти Тойлоқ тумани ҳудудидан ўтувчи Самарқанд–Ургут темирйўлининг маълум қисми шикастланган.

 

Қайд этилишича, сўнгги кунларда Ўзбекистон ва Тожикистоннинг тоғли ҳудудларида кузатилган кучли ёғингарчиликлар оқибатида Зарафшон дарёсида сув оқими кескин кучайган. Натижада дарё қирғоқларни ювиб кетган ва айрим жойларда ўзан йўналиши ўзгарган.

 

Расмий маълумотга кўра, ҳодисага дарёдаги сув сарфининг меъёрий 80–100 куб метр/сониядан 300 куб метр/сониягача ошгани сабаб бўлган. Оқибатда дарё ўзани темирйўлга яқин ҳудудларда 30–40 метргача кенгайиб, темирйўлнинг айрим қисмларига зарар етказган. 

 

Таъкидланишича, бундай гидрологик ҳолат сўнгги 20 йил давомида кузатилмаган. Ҳозирда ҳаракат хавфсизлигини таъминлаш мақсадида дарё қирғоқларини харсанг тошлар билан мустаҳкамлаш ишлари олиб борилмоқда. Бунга 15 та махсус техника жалб этилган, 30 та думпкар вагон орқали харсанг тошлар етказилган. Бундан ташқари, зарур қурилиш материаллари ортилган яна 130 та думпкар вагон ҳодиса ҳудудига йўналтирилган.

 

“Ўзбекистон темир йўллари”нинг билдиришича, темирйўл қатновини имкон қадар қисқа муддатда тўлиқ тиклаш ва поездлар ҳаракатининг узлуксизлигини таъминлаш бўйича барча зарур чоралар кўрилмоқда.

 

Маълумот ўрнида, мазкур участка 2025 йил ноябрь ойида фойдаланишга топширилган Самарқанд–Ургут янги темирйўл тармоғининг бир қисми ҳисобланади. Лойиҳа доирасида Самарқанд ва Ургут ўртасида 55,4 километр узунликдаги янги темирйўл қурилиб, иккита вокзал, иккита тўхташ пункти, иккита кўприк ҳамда 100 дан ортиқ сунъий иншоот барпо этилган.