Тошкент вилояти божхонасида "Раҳбар ва ёшлар" учрашуви ташкил этилди
Божхона тизимида юқори натижа кўрсатган бир гуруҳ ёш ходимлар рағбатлантирилди.
Тошкент вилояти божхона бошқармасида "Раҳбар ва ёшлар" учрашуви ташкил этилди. Бу ҳақда Тошкент вилояти божхона бошқармаси матбуот хизмати хабар берди.
Қайд этилишича, бугунги кунда бошқарма шахсий таркибининг қарийб 30 фоизини ёш ходимлар ташкил этади. Учрашувда бошқарма раҳбари ёшларни касб байрами билан табриклаб, уларнинг билим, ташаббускорлик ва замонавий фикрлаши божхона тизими ривожининг муҳим омили эканини таъкидлади.
Шунингдек, рақамли технологиялар, сунъий интеллект, хавфларни таҳлил қилишнинг замонавий усуллари ҳамда халқаро стандартларни жорий этиш жараёнида юқори малакали ёш кадрларга эҳтиёж тобора ортиб бораётгани қайд этилди. Ёш ходимлар келгусида божхона тизимининг турли раҳбарлик лавозимларини эгаллаши мумкин бўлган истиқболли кадрлар экани алоҳида таъкидланди.
Учрашув очиқ мулоқот руҳида ўтиб, ёш ходимларнинг таклиф ва ташаббуслари тингланди. Шунингдек, хизмат фаолиятида юқори натижаларга эришиб, фидойилик ва масъулияти билан ажралиб турган бир гуруҳ ёш ходимлар муносиб тақдирланди.
Таъкидланишича, бундай учрашувлар ёшларнинг касбий салоҳиятини ривожлантириш, уларнинг ташаббусларини қўллаб-қувватлаш ҳамда келажак учун малакали раҳбар кадрлар захирасини шакллантиришга хизмат қилади.
