Тошкентда 2 минг доллар пора олган кадастр бош инспектори ушланди

 

Давлат хавфсизлик хизмати томонидан Иқтисодий жиноятларга қарши курашиш департаменти ҳамда бошқа ҳуқуқни муҳофаза қилувчи органлар билан ҳамкорликда ўтказилган тезкор тадбирлар давомида Тошкент ва Андижон вилоятларида коррупция билан боғлиқ икки ноқонуний ҳолат фош этилди. Бу ҳақда ДХХ Zamon.uz' га маълум қилди.

 

Аниқланишича, ДХХнинг «Саll-маркази»га келиб тушган мурожаат асосида ўтказилган тезкор тадбирда Кадастр агентлигининг Тошкент шаҳри Яшнобод тумани бўлими бош инспектори учинчи шахс орқали 2 минг АҚШ доллари олаётган вақтида ушланди.

 

Маълум бўлишича, мансабдор маҳаллий фуқаро томонидан ноқонуний ўрнатилган енгил конструкцияли қурилмаларни буздириб ташламаслик ҳамда унга нисбатан маъмурий жарима қўлламаслик эвазига мазкур пул маблағини талаб қилган.

 

Яна бир ҳолатда эса Андижон шаҳрида яшовчи 1984 йилда туғилган фуқаро харидорга Андижон туманидаги Хакан саноат ҳудудида жойлашган, давлат захирасидаги 40 сотих ер майдонини гўёки «Э-аукцион» орқали ютиб олганини билдирган. Шунингдек, кадастр тизимидаги танишлари орқали мазкур ер майдонини унинг номига расмийлаштириб беришни ваъда қилиб, бунинг эвазига 160 минг АҚШ доллари талаб қилган.ДХХ, Ички ишлар органлари ҳамда Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбирда у олдиндан 80 минг АҚШ доллари олаётган вақтида ашёвий далиллар билан қўлга олинган.

 

Ҳозирда ҳар икки ҳолат юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.