Финляндия Фин қўлтиғининг шарқий қисмида ҳаво ва денгиз йўлларини ёпди
Мазкур чора Россиянинг шимоли-ғарбий ҳудудларига уюштирилган дрон ҳужумлари ортидан қўлланилди.
Финляндия Россиянинг шимоли-ғарбий ҳудудларига учувчисиз учиш аппаратлари ҳужумлари фонида Фин қўлтиғининг шарқий қисмида ҳаво ва денгиз қатновига вақтинчалик чекловлар жорий этди. Бу ҳақда мамлакат Мудофаа кучлари маълум қилди, дея хабар бермоқда Коммерсант.
Қайд этилишича, чекловлар шанба куни эрта тонгда эҳтиёт чораси сифатида кучга кирган. Шу билан бирга, Россияга дронлар ҳужуми амалга оширилган кечада Финляндия Ҳарбий-ҳаво кучлари ҳам жанговар шай ҳолатга келтирилиб, ҳарбий самолётлар ҳавога кўтарилган.
Финляндия Бош штабининг алоқа департаменти вакили Ере Палданиуснинг Ҳелсингин Саномат нашрига маълум қилишича, чекловлар Россияга уюштирилган дрон ҳужумлари сабаб жорий этилган.
Унинг сўзларига кўра, зарурат туғилганда фуқаролар хавфсизлигини таъминлаш ҳамда ваколатли органларнинг самарали ҳаракат қилиши учун ҳаво кузатуви кучайтирилган.
Бу Финляндиянинг Фин қўлтиғи устида қисқа муддат ичида жорий этган иккинчи чеклови бўлди. Мамлакат аввал ҳам 2 июль куни ушбу ҳудудда ҳаво ва денгиз қатновига вақтинчалик чекловлар киритган эди.
Айни куни Россиянинг Санкт-Петербург шаҳри кенг кўламли дронлар ҳужумига учради. Россия маълумотларига кўра, 72 та учувчисиз учиш аппарати уриб туширилган. Шаҳарнинг Киров туманидаги нефть терминалига зарба берилган, уриб туширилган дронлардан бири эса Петергоф ҳудудига қулаган. Ҳодиса оқибатида жабрланганлар ҳақида маълумот берилмаган.
