Навоийда каналга чўкиб кетган икки 15 ёшли бола ҳалок бўлди
Дастлабки экспертизага кўра, уларнинг ўлимига сув туфайли юзага келган механик асфикция сабаб бўлган.
Навоий вилоятининг Навбаҳор туманида 2011 йилда туғилган икки ўсмир каналга чўкиб кетиши оқибатида вафот этди. Бу ҳақда Бош прокуратура матбуот котиби Ҳаёт Шамсутдинов маълум қилди.
Дастлабки маълумотларга кўра, ҳодиса 2 июль куни соат 13:30 лар атрофида содир бўлган. Вояга етмаган Б.Р. ва С.А. синфдошлари билан бирга «Бешработ–Конимех» каналининг «Янгиобод» маҳалласи Бунёдкор кўчасидан оқиб ўтувчи қисмига чўмилиш учун борган. Оқибатда икки ўсмир сувга чўкиб, ҳалок бўлган.
Терговга қадар ўтказилган текширув давомида ҳодисада жиноят аломатлари аниқланмаган.
Суд-тиббий экспертизасининг дастлабки хулосасига кўра, ўсмирларнинг ўлимига юқори нафас йўлларининг сув билан беркилиши оқибатида юзага келган механик асфикция сабаб бўлган бўлиши мумкин.
Шунингдек, текширув жараёнида “Ҳудудий электр тармоқлари” Навбаҳор туман бўлими мутахассислари иштирокида канал бўйидаги деҳқончилик учун фойдаланилган сув насоси текширилди. Насос ишчи ҳолатда сувга туширилганда каналда электр токи мавжуд эмаслиги аниқланган.
Ҳозирда мазкур ҳолат юзасидан Навбаҳор туман прокуратураси томонидан терговга қадар текширув ҳаракатлари давом эттирилмоқда.
