Оҳангаронда даладаги хуфия жойдан синтетик наркотикни олган хорижлик ушланди
Хорижликнинг Тошкентдаги вақтинча яшаш хонадонидан электрон тарозилар ва бошқа ашёвий далиллар мусодара қилинди.
“Хавфсиз ва соғлом юрт” тезкор-профилактик тадбирлари доирасида Давлат хавфсизлик хизмати, Ички ишлар вазирлиги ҳамда Божхона органлари ходимлари ҳамкорлигида Тошкент вилоятининг Оҳангарон туманида ўтказилган тезкор тадбирда синтетик гиёҳвандлик воситаларининг ноқонуний муомаласига чек қўйилди. Бу ҳақда ДХХ маълум қилди.
Тезкор тадбир давомида Яқин Шарқ давлатларидан бирининг 1994 йилда туғилган фуқароси дала майдонидаги яширин жойдан 970 грамм «Мефедрон» синтетик гиёҳвандлик воситасини қазиб олиб кетаётган вақтида қўлга олинган.
Шундан сўнг тезкор тадбир давом эттирилиб, ушбу шахснинг Тошкент шаҳрининг Мирзо Улуғбек туманидаги вақтинча яшаш хонадони кўздан кечирилган. Натижада у ердан 2 дона электрон тарози, термоизолента ва гиёҳванд моддаларни қадоқлашда фойдаланилиши мумкин бўлган бошқа буюмлар ашёвий далил сифатида олиб қўйилган.
Ҳозирда мазкур ҳолат юзасидан дастлабки суриштирув ишлари олиб борилмоқда.
