Сергелидаги янги тиббиёт марказида 250 та иш ўрни яратилди
Шавкат Мирзиёев йилига 150 минг нафардан ортиқ беморга хизмат кўрсатадиган замонавий хусусий тиббиёт маркази фаолияти билан танишди.
Президент Шавкат Мирзиёев Тошкент шаҳрининг Сергели туманида жойлашган “Global International Hospital” хусусий кўп тармоқли тиббиёт маркази фаолияти билан танишди.
Қайд этилишича, марказни барпо этиш учун 30 миллион АҚШ доллари миқдорида инвестиция йўналтирилган. Замонавий тиббиёт муассасаси йилига 150 минг нафардан ортиқ аҳолига хизмат кўрсатиш имкониятига эга бўлиб, йиллик хизматлар ҳажмини 15 миллиард сўмга етказиш режалаштирилган.
Давлат раҳбарига марказ фаолияти юзасидан тақдимот ўтказилди. Президентимиз жарроҳлик, реанимация, даволаш бўлимлари ҳамда ситуацион марказда яратилган шароитлар билан танишди.
Лойиҳа доирасида 250 та янги иш ўрни яратилган. Муассасада хорижда малака оширган юқори малакали мутахассислар ҳамда чет эллик шифокорлар фаолият юритмоқда.
Тиббиёт маркази Буюк Британия, Италия ва Германиядан олиб келинган замонавий ускуналар, жумладан, PHILIPS компаниясининг илғор тиббий технологиялари билан жиҳозланган.
Президент Шавкат Мирзиёев марказни айрим йўналишлар бўйича таянч тиббиёт муассасасига айлантириш, бу ерда тўпланган илғор тажрибани шифокорлар малакасини ошириш ва замонавий тиббий хизматларни кенгайтиришда самарали қўллаш зарурлигини таъкидлади.
Давлат раҳбари марказ ходимлари билан мулоқот чоғида хусусий тиббиёт тизимини ривожлантириш, аҳолига сифатли тиббий хизмат кўрсатиш ҳамда тиббий хизматларни туризм билан уйғунлаштириш масалаларига алоҳида эътибор қаратди.
Шунингдек, шифохоналар ҳузурида меҳмонхона инфратузилмасини ривожлантириш ва хорижий тажрибани жорий этиш бўйича мутасаддиларга тегишли топшириқлар берилди.
