Сурхондарёда “ўзбек-афғон” чегарасидан 2,5 килограммдан ортиқ опий мусодара қилинди
Шунингдек, Тошкентда ўтказилган тезкор тадбирда қарийб 3 килограмм кўкнори бошоқлари аниқланди.
Давлат хавфсизлик хизмати томонидан гиёҳвандлик воситаларининг ноқонуний айланмасига қарши курашиш доирасида Сурхондарё вилояти ва Тошкент шаҳрида тезкор тадбирлар ўтказилди. Бу ҳақда ДХХ Zamon.uz' га хабар берди.
Маълум қилинишича, ДХХнинг Сурхондарё вилояти бўйича бошқармаси ходимлари ҳамда Чегара қўшинлари ҳарбий хизматчилари ҳамкорлигида ўтказилган тадбир давомида Ўзбекистон–Афғонистон давлат чегарасининг Термиз тумани ҳудудидан ўтувчи қисмида номаълум шахслар томонидан қолдириб кетилган 2 килограмм 562 грамм опий гиёҳвандлик воситаси аниқланиб, белгиланган тартибда мусодара қилинган.
Мазкур ҳолат юзасидан жиноят иши қўзғатилиб, гиёҳвандлик воситасининг эгаларини аниқлаш бўйича тезкор-қидирув тадбирлари олиб борилмоқда.
Шунингдек, “Хавфсиз ва соғлом юрт” тезкор-профилактик тадбирларининг иккинчи босқичи доирасида ДХХнинг Тошкент шаҳар бўйича бошқармаси ҳамда пойтахт ИИББ ходимлари ҳамкорлигида ўтказилган тезкор тадбирда Чилонзор туманида яшовчи 1974 йилда туғилган фуқаронинг хонадонидан 2 килограмм 930 грамм кўкнори бошоқлари топилиб, процессуал тартибда олиб қўйилган.
Ҳозирда ушбу ҳолат юзасидан дастлабки суриштирув ишлари давом эттирилмоқда.
