Тошкентда 230 та маҳаллада ярим йилда бирорта ҳам жиноят содир этилмади
Сергелида 29 та маҳалла “яшил” тоифага ўтди, 17 та маҳаллада умуман жиноят қайд этилмади.
Президент Шавкат Мирзиёев раислигида ўтказилган видеоселектор йиғилишида Тошкент шаҳрида маҳаллаларда хавфсиз муҳитни таъминлаш ва жиноятчиликнинг олдини олиш борасидаги ишлар муҳокама қилинди.
Йиғилишда пойтахт туманларига республика раҳбарлари бириктирилгани натижасида жамоат хавфсизлигини таъминлаш бўйича ижобий ўзгаришларга эришилгани қайд этилди.
Маълум қилинишича, йилнинг дастлабки олти ойида олдини олиш мумкин бўлган жиноятлар сони сезиларли даражада камайган. Хусусан, 230 та маҳаллада умуман жиноят содир этилмаган, яна 332 та маҳаллада жиноятлар кескин қисқарган.
Шунингдек, криминоген вазияти оғир деб баҳоланган маҳаллалар сони 60 тадан 23 тага камайгани таъкидланиб, бу пойтахтда жамоат хавфсизлигини таъминлаш бўйича жорий этилган янги ёндашувлар ўз самарасини бераётганини кўрсатиши қайд этилди.
Сергели туманида ҳам хавфсиз муҳитни таъминлаш борасида ижобий натижалар кузатилгани билдирилди. Илгари криминоген вазияти оғир деб баҳоланган 29 та маҳалла «яшил» тоифага ўтказилган, 17 та маҳаллада эса бирорта ҳам жиноят содир этилмаган.
Қайд этилишича, Сергели тумани бу борада Тошкент шаҳридаги туманлар орасида энг яхши натижалардан бирини кўрсатган.
Давлат раҳбари Ўзгариш маҳалласида йўлга қўйилган профилактика ишларини бошқа ҳудудларда ҳам оммалаштириш, тумандаги қолган 46 та маҳаллани «яшил» тоифага ўтказиш, яширин иқтисодиётни қисқартириш ҳамда ёшлар билан ишлашнинг янги механизмларини жорий этиш юзасидан мутасаддиларга топшириқлар берди.
Йиғилиш якунида ҳокимлар ва масъул раҳбарларнинг ҳисоботлари эшитилди.
