Тошкентнинг ҳар бир туманида 15–20 та замонавий ҳожатхона қурилади

 

Президент Шавкат Мирзиёев раислигида ўтказилган видеоселектор йиғилишида Тошкент шаҳрининг туризм инфратузилмасини ривожлантириш, тозаликни таъминлаш ва жамоат хизматлари сифатини ошириш масалалари муҳокама қилинди.

 

Қайд этилишича, йил бошидан буён пойтахтга қарийб 3 миллион нафар хорижлик сайёҳ ташриф буюрган. Уларнинг аксарияти тарихий обидалар, истироҳат боғлари, бозорлар, кафе ва ресторанлар ҳамда туристик маҳаллаларга пиёда саёҳат қилишни афзал кўради.

 

Шу муносабат билан автобус бекатлари, темир йўл вокзаллари, аэропорт ва метро бекатларида сайёҳлар учун шаҳар бўйлаб ҳаракатланиш маршрутларини кўрсатувчи, мобил телефонларга бепул ва қулай юклаб олинадиган рақамли хариталарни жорий этиш бўйича топшириқлар берилди.

 

Йиғилишда Тошкентнинг тоза, озода ва яшил шаҳар сифатидаги нуфузи сақлаб қолиниши зарурлиги алоҳида таъкидланди. Кўчалар, хиёбонлар ва боғлардаги тозалик даражаси аҳоли ҳамда сайёҳлар эҳтиёжлари нуқтаи назаридан танқидий таҳлил қилинди.

 

Давлат раҳбари тозалик фақат ободонлаштириш эмас, балки маданият ва қадрият масаласи эканини қайд этди. Маҳалла раислари, нуронийлар ва фаолларга аҳоли билан биргаликда ободонлаштириш, дарахт экиш ва парваришлаш ишларини кучайтириш ҳамда ёшларда “Тозалик остонадан бошланади” деган қадриятни шакллантириш зарурлиги таъкидланди.

 

Шунингдек, пойтахтда жамоат ҳожатхоналари етишмаслиги муаммосига эътибор қаратилди. Мутасаддиларга бир ой муддатда алоҳида дастур ишлаб чиқиш ҳамда жорий йилнинг ўзида Тошкентнинг ҳар бир туманида 15–20 тадан замонавий жамоат ҳожатхонаси қуриш учун ер майдонларини аукционга чиқариш вазифаси юклатилди.

 

Бундан ташқари, пойтахт бўйлаб чиқинди қутилари сонини кескин кўпайтириш бўйича ҳам зарур чоралар кўрилиши белгиланди.