Янги Сергели кўчасида янги савдо ва хизмат кўрсатиш инфратузилмаси барпо этилди
Умумий қиймати 18,7 миллиард сўмлик лойиҳа доирасида Сергелида 250 дан ортиқ янги иш ўрни яратилди.
Шавкат Мирзиёев 4 июль куни Тошкент шаҳрининг Сергели туманидаги Иттифоқ маҳалласида жойлашган Янги Сергели кўчасида барпо этилган савдо ва хизмат кўрсатиш инфратузилмаси фаолияти билан танишди.
Қайд этилишича, умумий қиймати 18,7 миллиард сўм бўлган лойиҳа доирасида кўчанинг 2,1 километр қисми тўлиқ реконструкция қилиниб, савдо, умумий овқатланиш, туризм ва кўнгилочар хизматларни ўз ичига олган 24/7 режимида фаолият юритадиган замонавий ҳудуд ташкил этилди.
Лойиҳа доирасида аҳолининг мазмунли ҳордиқ чиқариши учун 10 дан ортиқ болалар майдончаси, 8 та воркаут зонаси, китоб дўкони ҳамда нуронийлар маскани барпо этилган.
Мазкур ҳудуд атрофидаги тўртта маҳаллада 21 мингдан ортиқ аҳоли истиқомат қилади. Янги Сергели кўчасидан кунига ўртача 15–20 мингта автомобиль ҳаракатланади. Лойиҳа тўлиқ қувватда ишга тушгач, йилига 1,2 миллиондан ортиқ ташриф буюрувчига хизмат кўрсатиш имконияти яратилади.
Шунингдек, лойиҳа натижасида 250 дан ортиқ янги иш ўрни яратилган, 95 та тадбиркорлик субъекти фаолияти кенгайтирилди ва 22 та янги бизнес субъекти ташкил этилган.
Давлат раҳбари ҳудуддаги миллий меъморий услубда таъмирланган хонадонлар, ободонлаштирилган кўчалар ва аҳолига яратилган қулайликларни кўздан кечирди. Шунингдек, маҳалла фаоллари ва фуқаролар билан мулоқот қилиб, амалга оширилаётган ислоҳотларнинг аҳоли турмуш даражаси ва даромадларига таъсири билан қизиқди.
Маҳалла фаоллари янги инфратузилма ҳудуд қиёфасини тубдан ўзгартиргани, тадбиркорлик ривожланиб, аҳоли бандлиги ва даромадлари ошаётганини таъкидлаган.
