Ўзбекистон ва Қозоғистон атмосфера ҳавоси сифатини яхшилаш бўйича ҳамкорликни кучайтиради
Икки давлат “Тоза ҳаво” лойиҳаси доирасида қўшма илмий ишчи гуруҳ тузиш ва атмосфера мониторингини такомиллаштиришни режалаштирмоқда.
Тошкентдаги Марказий Осиё атроф-муҳит ва иқлим ўзгаришини ўрганиш университетида (Green University) Ўзбекистон ва Қозоғистон вакиллари иштирокида атмосфера ҳавосини муҳофаза қилиш ҳамда унинг сифатини яхшилашга бағишланган учрашув бўлиб ўтди.
Музокараларда атмосфера ҳавоси мониторингини такомиллаштириш, трансчегаравий ҳаво ифлосланишини камайтириш ҳамда бу борадаги илмий тадқиқотларни кенгайтириш масалалари муҳокама қилинди.
Қайд этилишича, мазкур учрашув 2026 йил 11 апрель куни Бухоро шаҳрида Ўзбекистон Президенти Шавкат Мирзиёев ва Қозоғистон Президенти Қосим-Жомарт Тоқаев ўртасида эришилган келишувларнинг амалий давоми бўлди. Давлат раҳбарлари ўшанда чегараолди ҳудудларда “Тоза ҳаво” қўшма лойиҳасини амалга ошириш муҳимлигини таъкидлаган эди.
Учрашувда Ўзбекистон томонидан Экология ва иқлим ўзгариши миллий қўмитаси, Иқлим ўзгариши миллий маркази, Гидрометеорология хизмати агентлиги ҳамда илмий муассасалар вакиллари, Қозоғистон томонидан эса Экология ва табиий ресурслар вазирлиги, «Казгидромет» ва Миллий гидрометеорология хизмати мутахассислари иштирок этди.
Томонлар атмосфера ҳавоси мониторинги натижалари, атмосфера циркуляцияси жараёнлари ҳамда PМ2.5 ва PМ10 майда дисперс заррачалари бўйича олиб борилган илмий тадқиқотлар юзасидан ўзаро ахборот алмашди.
Муҳокамалар давомида атмосфера ҳавоси давлат чегараларини тан олмаслиги, шу боис Ўзбекистон ва Қозоғистоннинг чегараолди ҳудудларида ифлосланишни камайтириш учун мувофиқлаштирилган илмий тадқиқотлар ва амалий чоралар зарурлиги таъкидланди.
Йиғилиш якунида трансчегаравий атмосфера ифлосланишини камайтиришга қаратилган қўшма илмий ишчи гуруҳни ташкил этиш ҳамда амалий тадбирларни мунтазам амалга ошириш бўйича келишувга эришилди.
Ташриф доирасида Қозоғистон делегацияси Ўзбекистонда “Тоза ҳаво” умуммиллий лойиҳаси доирасида амалга оширилаётган ишлар билан танишди. Хусусан, Тошкент вилоятидаги иссиқхоналарни кўчириш ишлари, Тошкент иссиқлик электр станциясида жорий этилган замонавий газ тозалаш тизимлари ҳамда автотранспорт воситалари учун экологик стикерлар бериш механизми намойиш этилди.
