Адабиёт музейи ёпилмайди, янги бинога кўчирилади — Фанлар академияси
Фанлар академияси Алишер Навоий номидаги давлат Адабиёт музейи фаолияти юзасидан тарқалган хабарларга муносабат билдириб, музей янги бино фойдаланишга топширилгач ўз ишини давом эттиришини маълум қилди.
Ўзбекистон Фанлар академияси Алишер Навоий номидаги давлат Адабиёт музейи фаолияти юзасидан ижтимоий тармоқларда тарқалаётган хабарларга расмий муносабат билдирди.
Қайд этилишича, сўнгги кунларда музей фаолияти билан боғлиқ айрим маълумотлар нотўғри ёки тўлиқ бўлмаган талқинда тарқатилгани жамоатчилик орасида асоссиз хавотирларни юзага келтирган.
Фанлар академияси маълумотига кўра, музейда амалга оширилаётган ишлар муассаса фаолиятини тугатиш ёки маданий мерос объектларига зарар етказишга эмас, балки ноёб қўлёзмалар, архив ҳужжатлари ва экспонатларни замонавий талабларга мос шароитларда сақлаш, уларни рақамлаштириш ҳамда келажак авлодларга бехатар етказишга қаратилган.
Билдирилишича, Вазирлар Маҳкамасининг 2026 йил 20 майдаги 234-Ф-сонли фармойиши асосида, Янги Тошкент шаҳрида Адабиёт музейи учун бунёд этилаётган янги бино фойдаланишга топширилгунга қадар музей фондлари вақтинча бошқа муассасаларга кўчирилмоқда.
Жумладан, музей фондидаги нодир қўлёзмалар, тошбосма манбалар ҳамда “Ўзбекистон ёзувчилари ва шоирлари архиви” фонди Вазирлар Маҳкамаси ҳузуридаги Ўзбекистондаги Ислом цивилизацияси марказига, бошқа экспонатлар эса Фанлар академиясининг Антропология институтига вақтинча сақлаш учун жойлаштирилмоқда.
Маълумотларга кўра, 2026 йил 9 июнь куни музейнинг 847 дона нодир қўлёзмаси белгиланган тартибда Ислом цивилизацияси марказининг махсус сақлаш хоналарига кўчирилган. Ҳозирда ушбу жараён бўйича зарур ҳужжатлар расмийлаштирилмоқда.
Шунингдек, музей фондида сақланаётган 1 491 дона тошбосма манба, 439 та папкадаги фото нусхалар, 145 та папкадаги плёнка ва негативлар, шунингдек 1 416 512 та ҳужжатдан иборат “Ўзбекистон ёзувчилари ва шоирлари архиви” фонди бирламчи хатловдан ўтказилгани, қолган экспонатлар инвентаризацияси эса давом этаётгани маълум қилинган.
Фанлар академияси музей томошабинлар ва тадқиқотчилар учун вақтинча ёпилган бўлсада, муассаса ходимлари ўз хизмат вазифаларини тўлиқ бажараётганини таъкидлаган.
Расмий муносабатда барча ишлар амалдаги қонунчилик ва белгиланган меъёрий тартиблар асосида, масъул мутахассислар иштирокида амалга оширилаётгани қайд этилиб, жамоатчиликдан ижтимоий тармоқларда тарқалаётган асоссиз хабарларга эмас, расмий манбаларга таяниш сўралди.
