Андижонда 38,3 млрд сўмлик кешбэк талон-торож қилинди
94 мингдан ортиқ фуқаро ва ижтимоий ҳимоя реестрига киритилган шахслар номидан кешбэк маблағлари расмийлаштирилган.
Бош прокуратура ҳузуридаги Департамент томонидан Андижон вилоятида 38,3 миллиард сўмлик бюджет маблағларини ноқонуний ўзлаштириш ҳолати аниқланди.
Терговга қадар текширувда маълум бўлишича, фуқаро Й.Қ. ва бошқа шахслар ўзаро тил бириктириб, 5 та МЧЖ номидан бошқа корхоналар томонидан гўёки 2,2 триллион сўмлик маҳсулот етказиб берилгани ҳақида сохта электрон ҳисоб-фактураларни расмийлаштирган.
Шунингдек, савдодан тушган маблағлар назорат-касса машиналари орқали расмийлаштирилгандек кўрсатилиб, харид чеклари шакллантирилган. Ушбу чекларнинг маълумотлари асосида 94 минг 921 нафар фуқаро ҳамда ижтимоий ҳимоя реестрига киритилган шахслар номидан Солиқ Мобиле иловаси орқали кешбэк маблағлари расмийлаштирилган.
Натижада 38,3 миллиард сўм бюджет маблағи ўзлаштириш ва растрата қилиш йўли билан талон-торож қилингани аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ҳамда 228-моддаси (ҳужжатлар, штамплар, муҳрлар, бланкаларни қалбакилаштириш ва улардан фойдаланиш) билан жиноят иши қўзғатилиб, тергов ҳаракатлари давом эттирилмоқда.
