Бектемирда гиёҳванд моддаларни “закладка” усулида тарқатган шахслар ушланди
Қўлга олинган уч нафар шахсга нисбатан жиноят иши қўзғатилди.
Ички ишлар вазирлиги томонидан 1–31 июль кунлари ўтказилаётган “Хавфсиз ва соғлом юрт” кенг қамровли тезкор-профилактик тадбирлари доирасида Тошкент шаҳрининг Бектемир туманида гиёҳвандлик воситалари ноқонуний муомаласига чек қўйилди. Бу ҳақда Тошкент Ички ишлар бош бошқармаси матбуот хизмати хабар берди.
Маълум қилинишича, “Ийк ота” маҳалласида хизмат олиб бораётган патруль-пост хизмати ходимлари шубҳали ҳаракатланган икки нафар шахсни холислар иштирокида кўздан кечирган. Натижада уларнинг ёнидан 43 дона алоҳида қадоқланган гиёҳвандлик моддаси аниқланиб, далилий ашё сифатида расмийлаштириб олинган.
Шунингдек, Бектемир тумани Ички ишлар органлари фаолиятини мувофиқлаштириш бошқармаси ходимлари томонидан ўтказилган яна бир тезкор тадбирда шубҳали шахс кўздан кечирилганда, ундан 15 дона қадоқланган гиёҳвандлик моддаси топилиб, процессуал тартибда мусодара қилинган.
Ҳар иккала ҳолат юзасидан Жиноят кодексининг 273-моддаси 5-қисми билан жиноят ишлари қўзғатилиб, гумонланувчиларга нисбатан қамоққа олиш тарзидаги эҳтиёт чораси қўлланилган.
Ички ишлар вазирлиги “Хавфсиз ва соғлом юрт” кенг қамровли тезкор-профилактик тадбирлари республика бўйлаб давом этаётганини маълум қилди.
