Хитойда 325 млн долларлик пора олган собиқ амалдор ўлим жазосига ҳукм қилинди

Хитойнинг Жиангсу провинциясидаги Нанкин ривожланиш зонаси маъмурий қўмитаси ижрочи директорининг собиқ биринчи ўринбосари Янг Юлин порахўрлик ва бошқа қатор жиноятлар бўйича айбдор деб топилиб, ўлим жазосига ҳукм қилинди. Бу ҳақда Xinhua хабар берди.

 

Жиангсу провинциясидаги Чанчжоу шаҳри Ўрта халқ суди ҳукмига кўра, у умрбод сиёсий ҳуқуқлардан маҳрум қилиниб, барча шахсий мол-мулки мусодара этилади.

 

Суд маълумотларига кўра, Янг Юлин 1993–2023 йиллар давомида Нанкин шаҳридаги турли давлат лавозимларида ишлаб, ўз мансаб ваколатларидан фойдаланиб қурилиш шартномалари, бизнес фаолияти, ер участкаларини ажратиш ва молиялаштириш масалаларида ташкилот ҳамда жисмоний шахсларга ноқонуний ёрдам кўрсатган. Бунинг эвазига у жами 2,21 миллиард юань (тахминан 325 миллион АҚШ доллари) миқдорида пул ва қимматбаҳо буюмларни ноқонуний равишда олган.

 

Ҳукмда қайд этилишича, собиқ амалдор пора олишдан ташқари, давлат маблағларини ўзлаштириш, пора бериш, давлат маблағларини ноқонуний ўзлаштириш, мансаб ваколатини суиистеъмол қилиш ва пул ювиш жиноятларида ҳам айбдор деб топилган.

 

Шунингдек, у бошқа шахслар билан тил бириктириб давлат маблағларини фирибгарлик йўли билан қўлга киритган, давлат хизматчиларига ноқонуний манфаат эвазига пора берган, давлат компаниялари маблағларини бошқаларнинг бизнеси учун ишлатган ҳамда ерларни бузиш ва ҳудудларни ривожлантириш лойиҳаларини қонунга хилоф равишда амалга оширган. Суд бу ҳаракатлар жиддий ижтимоий оқибатларга олиб келганини таъкидлади.

 

Бундан ташқари, Янг ноқонуний равишда ер участкаларини ўтказиш бўйича тўловларни қайтариб бергани оқибатида давлатга иқтисодий зарар етказган. Шунингдек, у пора эвазига орттирган маблағларнинг келиб чиқишини яшириш мақсадида уларни ўзи назорат қилган компанияларга қарз сифатида расмийлаштиргани аниқланган.

 

Суд Янг олган пора миқдори ниҳоятда катта бўлгани, жиноятларининг ўта оғирлиги, жамиятга салбий таъсири ҳамда давлат ва халқ манфаатларига жуда катта зарар етказганини инобатга олиб, унга ўлим жазоси тайинлади.

 

Қайд этилишича, Янг тергов давомида бошқа шахслар содир этган жиноятлар ҳақида маълумот берган ва бу маълумотлар тасдиқланган. Бироқ суд унинг жиноятларининг оғирлиги ушбу ҳолатни жазони енгиллаштириш учун етарли асос деб ҳисобламади.

 

Мазкур иш бўйича очиқ суд мажлислари жорий йилнинг 18 март ва 28 апрель кунлари бўлиб ўтган. Судда Янг айбига иқрор бўлиб, қилмишидан пушаймон эканини билдирган.