Қирғизистонда аёлларни ўлдирганлик учун умрбод қамоқ жазоси жорий этилиши мумкин
Қонун лойиҳаси аёллар ҳаётини ҳуқуқий ҳимоя қилишни кучайтиришга қаратилган.
Қирғизистон парламенти депутати Бурул Аманова мамлакат Жиноят кодексига «фемитсид» тушунчасини киритиш ҳамда ушбу турдаги жиноятлар учун энг оғир жазони белгилашни назарда тутувчи қонун лойиҳасини жамоатчилик муҳокамасига тақдим этди. Бу ҳақда 24.kg хабар берди.
Лойиҳага кўра, фемитсид аёлнинг жинсига нисбатан нафрат ёки камситиш асосида, зўрлаш билан боғлиқ ҳолда, ҳомиладор аёлни қасддан ўлдириш ёки аёлни ўз жонига қасд қилишга мажбур этиш оқибатида содир этилган ўлим ҳолатларини қамраб олади.
Қонун лойиҳасида бундай жиноятларни содир этган шахсларга умрбод озодликдан маҳрум қилиш, мол-мулкини мусодара қилиш ҳамда уларга нисбатан амнистия қўлламаслик таклиф этилган.
Бурул Аманованинг таъкидлашича, қонун лойиҳаси феминизм ёки феминистик ҳаракатни қўллаб-қувватлаш билан боғлиқ эмас. Унинг асосий мақсади аёллар ҳаётини ҳуқуқий жиҳатдан янада кучлироқ ҳимоя қилиш ва аёлларга нисбатан содир этилган қотилликларни алоҳида жиноят тури сифатида белгилашдан иборат.
Қонун лойиҳасига илова қилинган изоҳда Қирғизистон Бош прокуратураси маълумотларига таянилиб, мамлакатда аёлларга қарши содир этилаётган жиноятлар сони йилдан йилга ортиб бораётгани қайд этилган.
Шунингдек, Аёллар, тинчлик ва хавфсизлик (WPS) индекси натижаларига кўра, Қирғизистон 2021 ва 2023 йилларда Марказий Осиёда аёллар учун энг хавфли мамлакат сифатида баҳоланган.
