Қирғиз–Ўзбек чегарадаги пунктларда 27 нафар ходим қўлга олинди

 

Қирғизистоннинг Боткен вилоятида Ўзбекистон билан чегарадош «Қадамжай-Автодорожний» ва «Чечме-Автодорожний» назорат-ўтказиш пунктларида махсус операция ўтказилиб, 27 нафар чегара, божхона ва ветеринария хизмати ходими қўлга олинди.

 

24.kg нашри манбаларига кўра, операция 5 июль куни кечқурун Қирғизистон Давлат миллий хавфсизлик қўмитаси (ГКНБ) ходимлари ҳамда «Альфа» махсус бўлинмаси иштирокида ўтказилган. Қўлга олинганлар коррупцияга алоқадорликда гумон қилинмоқда.

 

Хабарда айтилишича, махсус операция вақтида назорат пунктларидан биридаги чегара ходими тўрт марта, яна бир ҳарбий хизматчи эса бир марта огоҳлантирувчи ўқ узган. Ҳолат юзасидан қурол қўлланишининг қонунийлиги ўрганилмоқда.

 

Манбалар маълумотига кўра, тинтув давомида айрим хизмат автомобилларидан нақд пул маблағлари топилган. Шунингдек, «Чечме-Автодорожний» назорат пунктининг икки ходими ноқонуний пул олаётгани видеокузатув камералари орқали қайд этилгани айтилмоқда.

 

Дастлабки маълумотларга кўра, «Чечме-Автодорожний» пунктидан 11 нафар, «Қадамжай-Автодорожний» пунктидан эса 16 нафар ходим ГКНБнинг Боткен вилояти бошқармасига олиб кетилган. Бундан ташқари, икки дона АК-74 автомати, иккита ўқдон ва 60 дона ўқ-дори мусодара қилинган.

 

Тергов ҳаракатлари сабаб назорат-ўтказиш пунктлари фаолияти вақтинча тўхтатилган. Натижада чегарада тахминан 3 минг нафар фуқаро ва 400 та транспорт воситаси навбатда қолган. Кейинчалик «Қадамжай-Автодорожний» назорат пунктида ҳаракат қайта тикланган.

 

Ҳозирча Қирғизистон Давлат миллий хавфсизлик қўмитаси мазкур махсус операция юзасидан расмий баёнот бермаган.