Исроилнинг АҚШдан ташқари ҳам кўплаб дўстлари бор — Нетаняху
Исроил Бош вазири Доналд Трампни мамлакатнинг энг яқин иттифоқчиси деб атар экан, Исроилнинг дунёда бошқа кучли ҳамкорлари ҳам борлигини таъкидлади.
Исроил Бош вазири Бенямин Нетаняху мамлакатнинг энг яқин иттифоқчиси АҚШ эканини таъкидлар экан, Исроил дунёда Қўшма Штатлардан ташқари ҳам кўплаб ишончли ҳамкор ва дўстларга эга эканини маълум қилди.
У Fox News телеканалига берган интервьюсида АҚШ вице-президенти Ж.Д. Венснинг Исроил АҚШнинг ягона кучли иттифоқчи эканини ёдда тутиши кераклиги ҳақидаги фикрига муносабат билдирган.
“Мен Ж.Д. Венсни ҳурмат қиламан, муносабатларимиз жуда яхши. Аммо бу унинг ҳар бир фикрига қўшиламан дегани эмас. Доналд Трамп Оқ уйда мен кўрган энг буюк дўст. Шу билан бирга, бизнинг бошқа дўстларимиз ҳам бор. Масалан, 1,4 миллиард аҳолига эга Ҳиндистон бизни катта қўллаб-қувватлайди”, — деган Нетаняху.
Бош вазирнинг сўзларига кўра, дунёнинг кўплаб давлатлари раҳбарлари Исроил билан ҳамкорликни ривожлантириш истагини билдириб, мунтазам алоқада бўлиб туришади.
Шу билан бирга, Нетаняху АҚШ ва Исроил ўртасидаги стратегик иттифоқ ўзгармаслигини алоҳида таъкидлади.
“Американинг Исроилдан муҳимроқ иттифоқчиси йўқ, Исроилнинг эса Қўшма Штатлардан муҳимроқ иттифоқчиси йўқ”, — дея таъкидлаган у.
Нетаняхунинг баёноти АҚШ ва Эрон ўртасидаги музокаралар ҳамда Вашингтон ва Тел-Авив ўртасидаги муносабатлар халқаро муҳокамалар марказида бўлиб турган бир пайтда янграган.
