“Махсус ҳарбий операция” ҳақиқий урушга айланди — Песков

 

Россия президенти матбуот котиби Дмитрий Песков Россиянинг Украинадаги “махсус ҳарбий операцияси” эндиликда “ҳақиқий уруш” тусини олганини маълум қилди. Унинг фикрича, бунга Ғарб давлатларининг Украинани қўллаб-қувватлаши сабаб бўлган.

 

Песков бу ҳақда ВГТРК журналисти Павел Зарубинга берган интервьюсида сўзлаган.

 

“Уруш кетяпти, бу ҳақиқий уруш. Ҳаммаси махсус ҳарбий операция сифатида бошланган эди. Аммо Берлин, Париж, Гаага, Осло ва, афсуски, Вашингтон Киевни қўллаб-қувватлагани сабаб бу урушга айланди”, — дея таъкидлаган у.

 

Кремль вакилининг таъкидлашича, Ғарб давлатлари Украинага разведка маълумотлари, сунъий йўлдош тизимлари ва хорижий қуролларни нишонга йўналтириш орқали ёрдам бермоқда.

 

Песков, шунингдек, Россия қўшинлари фронтда “тизимли равишда олдинга силжиётгани” ва бунинг натижалари кўринаётганини иддао қилган. У Костянтиновка устидан назорат ўрнатилгани ҳақидаги Россия баёнотини такрорлаган. Бироқ Украина президенти Владимир Зеленский аввалроқ бу даъволарни рад этган, мустақил мониторинг лойиҳалари ҳам мазкур маълумотни тасдиқламаган.

 

Кремль матбуот котиби Украина дронлари Россия ҳудудидаги энергетика ва фуқаролик инфратузилмаси объектларига зарба бераётганини айтиб, бундай ҳужумларни “террористик ҳаракатлар” деб баҳолаган.

 

Россия 2022 йилда Украинага кенг кўламли бостириб кирганидан буён расмийлар можаро учун “махсус ҳарбий операция” атамасидан фойдаланиб келмоқда. Шу билан бирга, Россияда урушни очиқчасига «уруш» деб атаган айрим шахслар, жумладан собиқ Москва депутати Алексей Горинов, армия ҳақида “сохта маълумот тарқатиш” моддаси билан жиноий жавобгарликка тортилган эди.