Россия Киевга навбатдаги йирик ҳаво ҳужумини уюштирди: 10 дан ортиқ киши ҳалок бўлди
Украина маълумотига кўра, Россия тунги ҳужумда 68 та ракета ва 351 та дрондан фойдаланган.
Россия Киев ва унинг атрофидаги ҳудудларга кенг кўламли ҳаво ҳужуми уюштирди. Дастлабки маълумотларга кўра, камида 11 киши ҳалок бўлган, ўнлаб инсонлар жароҳатланган. Бу ҳақда пойтахт мери Виталий Кличко маълум қилди.
Украина расмийларига кўра, 6 июлга ўтар кечаси Россия қуролли кучлари Киев шаҳри ҳамда Киев вилоятига ракета ва дронлар ёрдамида оммавий зарба берган. Бу сўнгги кунларда Украина пойтахтига уюштирилган иккинчи йирик ҳаво ҳужуми бўлди.
Киев шаҳар ҳарбий маъмурияти маълумотига кўра, пойтахтнинг ўзида 10 киши ҳалок бўлган, 46 киши, жумладан беш нафар бола жароҳат олган. Қутқарув хизматлари шаҳарнинг 20 дан ортиқ манзилида вайроналарни тозалаш ишларини давом эттирмоқда.
Энг оғир вазият Дарнитский ва Подолский туманларида кузатилган. Ҳужум оқибатида 15 та турар жой биноси шикастланган ёки вайрон бўлган. Подолский туманидаги тўққиз қаватли турар жой биносининг бир қисми қулаб тушган бўлиб, вайроналар остида одамлар қолган бўлиши мумкин.
Киев вилоятида эса бир киши ҳалок бўлган, 15 киши жароҳатланган. Жабрланганлар орасида тўққиз ойлик чақалоқ ҳам бор. Расмийлар қурбонлар сони ортиши мумкинлигини билдирмоқда.
Одесса вилоятида ҳам Россия ҳужуми оқибатида гараж ва хусусий уй зарар кўрган. Бир киши жароҳат олгани маълум қилинган.
Россия Мудофаа вазирлиги зарбалар Украина ҳарбий-саноат мажмуалари, ёқилғи-энергетика объектлари ва ҳарбий аэродром инфратузилмаларига қаратилганини маълум қилган.
Украина Ҳарбий-ҳаво кучлари эса бир кеча давомида учирилган 68 та ракетадан 38 таси ҳамда 351 та дрондан 326 таси уриб туширилгани ёки радиоэлектрон кураш воситалари орқали зарарсизлантирилганини билдирган. Ушбу маълумотлар мустақил манбалар томонидан тасдиқланмаган.
