Ўзбекистонда 220 минг хонадоннинг газ таъминоти яхшиланади
711,9 километр газ тармоғи ва 400 та газ тақсимлаш пункти таъмирланади ҳамда реконструкция қилинади.
Президент Шавкат Мирзиёев нефть-газ тармоғида 2026–2027 йиллар куз-қиш мавсумига тайёргарлик ишлари юзасидан ахборот билан танишди.
Тақдимотда аҳоли, ижтимоий соҳа объектлари ва иқтисодиёт тармоқларини энергия ресурслари билан барқарор таъминлаш бўйича ишлаб чиқилган комплекс чора-тадбирлар кўриб чиқилди. Унда табиий ва суюлтирилган газ етказиб бериш, магистраль ва ҳудудий газ тармоқларини таъмирлаш, ёқилғи захираларини шакллантириш ҳамда авария-тиклаш бригадаларининг шайлигини таъминлаш масалалари муҳокама қилинди.
Маълум қилинишича, куз-қиш мавсумигача магистраль газ қувурларининг 53,7 километр нуқсонли қисми алмаштирилади, компрессор станцияларидаги 77 та газ ҳайдаш агрегати мукаммал таъмирланади.
Шунингдек, 881 та маҳалладаги 220 минг хонадонда газ таъминотини яхшилаш мақсадида уч босқичли газ тақсимлаш тизими икки босқичли тизимга ўтказилади. 711,9 километр газ тармоғи ҳамда 400 та газ тақсимлаш пункти реконструкция ва мукаммал таъмирдан чиқарилади.
Куз-қиш мавсумида аҳолига 325,7 минг тонна суюлтирилган газ етказиб бериш режалаштирилган. Жумладан, бориш қийин бўлган 229 та қишлоқдаги 104,7 минг истеъмолчига 8,2 минг тонна суюлтирилган газ етказилиши белгиланган.
Қиш мавсуми учун ёқилғи захиралари ҳам шакллантирилмоқда. Режаларга кўра, декабрь–январь ойлари учун 120 минг тонна автобензин захираси яратилади, иссиқлик электр станцияларига эса мавсум давомида 4 миллион 161 минг тонна кўмир етказиб берилади.
Бундан ташқари, “Ўзбекнефтгаз” тизимидаги корхоналарда 90 та технологик қурилмада таъмирлаш ишлари амалга оширилади. Бу ишлаб чиқариш қувватларининг узлуксиз ишлаши ва энергия ресурсларини барқарор етказиб беришни таъминлашга хизмат қилиши қайд этилди.
Президент тайёргарлик ишлари нефть-газ тармоғи билан чекланмай, энергетика ва коммунал соҳалар билан узвий боғлиқ ҳолда олиб борилиши зарурлигини таъкидлади. Шу муносабат билан республика ва ҳудудий комиссиялар фаолиятини мувофиқлаштириш, белгиланган чора-тадбирлар ижросини қатъий назорат қилиш ҳамда куз-қиш мавсумига тайёргарликни ўз вақтида якунлаш бўйича масъулларга тегишли топшириқлар берилди.
