I Халқаро ислом цивилизацияси форумида Президент мурожаати ўқиб эшиттирилди

 

Тошкент шаҳрида “I Халқаро ислом цивилизацияси форуми: Тинчлик, бағрикенглик ва илм-маърифат йўли” мавзусидаги халқаро форум ўз ишини бошлади.

 

Форумда Ўзбекистон Республикаси Президенти Шавкат Мирзиёевнинг форум иштирокчиларига йўллаган мурожаати Президент маслаҳатчиси Хайриддин Султонов томонидан ўқиб эшиттирилди.

 

Форумда сўзга чиққан Ўзбекистондаги Ислом цивилизацияси маркази директори Фирдавс Абдухолиқов Президент мурожаатининг мазмун-моҳиятига тўхталар экан, унда илгари сурилган ташаббуслар Марказ фаолиятини янги босқичга олиб чиқишини таъкидлади.

 

Унинг қайд этишича, давлат раҳбари мурожаатида Қуръони каримдаги «Иқро!» («Ўқи!») оятининг бугунги кунда ҳам ўз долзарблигини йўқотмаганига алоҳида урғу берилган. Мазкур даъват илм-фан, маърифат, тинчлик ва тараққиёт йўлида хизмат қилаётган барча инсонлар учун йўлчи юлдуз бўлиб қолаётгани таъкидланган.

 

Шунингдек, мурожаатда айнан шу муборак калом Ўзбекистондаги Ислом цивилизацияси маркази бош пештоқига битилгани, у марказнинг асосий мақсади — ислом цивилизациясининг бебаҳо меросини асраб-авайлаш, чуқур ўрганиш ва шу асосда дунё халқлари ўртасида дўстлик ҳамда ҳамкорликни мустаҳкамлашдек улуғ вазифани ифодалаши қайд этилган.

 

Президент Шавкат Мирзиёев Ислом цивилизацияси марказини халқимизнинг тарихий хотираси, буюк аждодлар меросига бўлган чуқур ҳурмат рамзи ва айни пайтда Янги Ўзбекистоннинг келажакка қаратилган шиддатли интилишининг ёрқин тимсоли сифатида баҳолади.

 

Бундан ташқари, давлат раҳбари Марказ очиқ интеллектуал майдон бўлиб, дунёнинг турли мамлакатларидан олимлар, тадқиқотчилар, диний арбоблар ва мутахассисларни бирлаштириш, фундаментал илмий тадқиқотлар олиб бориш, қўшма лойиҳалар ва таълим дастурларини амалга ошириш учун муҳим платформага айланганини таъкидлади.

 

Фирдавс Абдухолиқовнинг сўзларига кўра, Президентнинг Ислом цивилизацияси маркази қисқа вақт ичида ўтмиш билан келажакни, Шарқ билан Ғарбни, қадимий анъаналар билан замонавий илм-фан ютуқларини боғловчи интеллектуал кўприкка айлангани ҳақидаги эътирофи марказ жамоаси зиммасига янада катта масъулият юклайди.