Навоийда ноқонуний олтин қазиётган 3 фуқаро тупроқ остида қолиб кетди
Ҳодиса Хатирчи туманидаги тоғ ҳудудида ноқонуний қазилган чуқурликда содир бўлган.
Навоий вилоятида ноқонуний олтин қазиш мақсадида қазилган чуқурликда тупроқ остида қолиб кетган уч нафар фуқаро қутқариб олинди.
Фавқулодда вазиятлар вазирлиги маълум қилишича, ҳодиса 7 июль куни соат 04:22 атрофида Хатирчи тумани «Ангидон» маҳалласи, Қуврай қишлоғи тоғ ҳудудида содир бўлган.
Дастлабки маълумотларга кўра, тўрт нафар фуқаро ноқонуний равишда олтин қазиб олиш мақсадида кон ҳудудига борган. Уларнинг уч нафари ноқонуний қазилган чуқурликка тушиб кетиб, тупроқ остида қолган.
Ҳодиса вақтида ташқарида қолган тўртинчи фуқаро зудлик билан атрофдагилар ҳамда Навоий вилояти Фавқулодда вазиятлар бошқармасига хабар берган.
Қутқарувчилар воқеа жойига етиб келгунига қадар маҳаллий аҳоли ва ҳодиса ҳақида хабар берган фуқаро чуқурликдан бир нафар жабрланувчини чиқаришга муваффақ бўлган.
Шундан сўнг ФВБ қутқарувчилари воқеа жойига тезкор етиб келиб, тупроқ остида қолган яна икки нафар фуқарони қутқариб олган.
Қутқарилган фуқароларга зарур тиббий ёрдам кўрсатилиб, даволаниш учун тегишли тиббиёт муассасасига юборилган.
Ҳодиса юзасидан ваколатли идоралар томонидан суриштирув ишлари олиб борилмоқда.
