Сирдарё ИЭС мутахассиси Хитойдаги халқаро танловда 2-ўринни эгаллади
Хитойда Осиё давлатлари ва Шанхай ҳамкорлик ташкилоти аъзо мамлакатлари энергетика соҳаси мутахассислари ўртасида касбий маҳорат танлови бўлиб ўтди.
2026 йил 30 июнь – 4 июль кунлари Хитой Халқ Республикасининг Гуанчжоу шаҳрида Осиё мамлакатлари ҳамда Шанхай ҳамкорлик ташкилоти (ШҲТ)га аъзо давлатлар энергетика соҳаси мутахассислари ўртасида халқаро касбий маҳорат танлови бўлиб ўтди.
Мазкур нуфузли мусобақада “Иссиқлик электр станциялари” АЖ Сирдарё ИЭС филиали электр цехи бошлиғи ўринбосари Ғофур Холназаров муваффақиятли иштирок этиб, 24 нафар иштирокчи орасида фахрли 2-ўринни эгаллади.
Ғофур Холназаров “110 кВ юқори кучланишли кабель линияларида синов ишлари ва кабель муфталарини монтаж қилиш” йўналишида ўз билим ва амалий кўникмаларини намойиш этди.
Танлов давомида иштирокчиларнинг кабель линияларидаги носозликларни аниқлаш, кабель параметрларини белгилаш ҳамда юқори кучланишли кабель муфталарини монтаж қилиш бўйича амалий маҳорати, шунингдек, меҳнат муҳофазаси ва техника хавфсизлиги талабларига риоя этиш даражаси баҳоланди.
Мусобақа Осиё давлатлари мутахассислари ўртасида илғор тажриба алмашиш, замонавий технологияларни ўзлаштириш ва энергетика соҳасидаги халқаро ҳамкорликни янада ривожлантириш мақсадида ташкил этилди.
Якуний натижаларга кўра, 1-ўрин Хитой Халқ Республикаси вакилига насиб этган бўлса, 2-ўринни Ўзбекистон вакили – Сирдарё ИЭС мутахассиси Ғофур Холназаров қўлга киритди.
“Халқаро танловда эришган натижам мамлакатимиз энергетика соҳаси мутахассисларининг касбий салоҳияти юксак эканини яна бир бор тасдиқлади. Бу тажриба келгусида электр тармоқларининг ишончлилигини ошириш ва илғор амалиётларни ишлаб чиқаришга татбиқ этишда муҳим аҳамият касб этади”, – дейди Ғофур Холназаров.
