Тошкентда икки фуқаро қурол ва ўқ-дориларни ўз ихтиёри билан топширди
Фуқаролар марҳум отаси ва турмуш ўртоғидан қолган қурол-яроғларни ҳуқуқни муҳофаза қилувчи органларга топширган.
ДХХ маълум қилишича, Тошкент шаҳрининг Яккасарой туманида яшовчи 1981 йилда туғилган фуқаро марҳум отаси алоҳида яшаган хонадонда сақланаётган қурол-яроғларни ҳуқуқни муҳофаза қилувчи органларга ўз ихтиёри билан топширган.
Натижада 1 дона винтовка, 19 дона ўқотар ов қуроли, 13 дона қурол стволи ва колодкалари, 117 дона ўқ-дори, шунингдек, қуролларга оид бошқа эҳтиёт қисмлар қабул қилиб олинган.
Шунингдек, ДХХ ва ИИВнинг Тошкент шаҳар бошқармалари ҳамкорлигида ўтказилган яна бир тадбирда Миробод туманида яшовчи 1960 йилда туғилган аёл марҳум турмуш ўртоғига тегишли бўлган 2 дона ўқотар ов қуроли ҳамда 181 дона ўқ-дорини ихтиёрий равишда топширган.
