БМТ Ўзбекистонни сув соҳасидаги энг илғор уч давлат қаторига киритди
БМТ форумида Ўзбекистоннинг сув ресурсларини бошқариш ва ичимлик суви таъминоти бўйича амалга ошираётган ислоҳотлари халқаро ҳамжамиятга тақдим этилди.
Айни кунларда Нью-Йорк шаҳрида Бирлашган Миллатлар Ташкилотининг Барқарор ривожланиш мақсадлари бўйича юқори даражадаги сиёсий форуми бўлиб ўтмоқда. Унда Ўзбекистоннинг сув ресурсларини бошқариш ва ичимлик суви таъминоти соҳасида сўнгги йилларда эришган натижалари халқаро ҳамжамиятга тақдим этилди.
Форум доирасида Ўзбекистон Президенти Администрацияси раҳбари ўринбосари Тимур Бутунбаев мамлакатда Барқарор ривожланишнинг 6-мақсади — “Тоза сув ва санитария” йўналишида амалга оширилган ислоҳотлар ҳамда уларнинг амалий натижалари юзасидан маъруза қилди.
Маълум қилинишича, UN-Water баҳолашига кўра, 2026 йилда Ўзбекистон мазкур йўналишда сезиларли тараққиётга эришган дунёдаги учта давлатдан бири сифатида эътироф этилди. Ушбу рўйхатдан, шунингдек, Хитой ва Сан-Томе ва Принципи ҳам ўрин олди.
Қайд этилишича, сўнгги йилларда мамлакатда сув хўжалигини модернизация қилиш, соҳани рақамлаштириш, сувни тежовчи технологияларни кенг жорий этиш, аҳолини сифатли ичимлик суви билан таъминлаш ҳамда сув ресурсларини самарали ва барқарор бошқариш бўйича кенг кўламли ислоҳотлар амалга оширилди.
Натижада Ўзбекистонда сув стресси кўрсаткичи 2017 йилдаги 169 фоиздан 2022 йилда 122 фоизгача камайиб, 47 фоиз бандга пасайди.
Форум иштирокчиларига, шунингдек, Ўзбекистоннинг сув соҳасидаги институционал ва ҳуқуқий ислоҳотлари, минтақавий сув дипломатияси ҳамда трансчегаравий сув ресурсларини самарали бошқаришга қаратилган ташаббуслари ҳақида ҳам батафсил маълумот берилди.
Мазкур эътироф Ўзбекистонда сув хавфсизлигини мустаҳкамлаш, сув ресурсларидан оқилона фойдаланиш ва уларни барқарор бошқариш борасида амалга оширилаётган ислоҳотлар халқаро миқёсда ҳам юқори баҳоланаётганининг навбатдаги тасдиғи бўлди.
