Бухорода университетга тегишли 5 та машина хатланди
Маълум бўлишича, МИБ орқали ишга тикланган ходимга маъмурият маош тўлашни хоҳламаган.
Фуқаролик ишлари бўйича Навоий вилоят судининг ижро варақаларига кўра, ундирувчи Д.К.ни ишга тиклаш, 139.423.357 сўм иш ҳақи ва 6.000.000 сўм маънавий зарар ундириш белгиланган.
Ижро ҳужжатлари Мажбурий ижро бюросининг Бухоро шаҳар бўлими иш юритувига келиб тушган ва ижро иши юритишни қўзғатиш тўғрисида қарорлар қабул қилиниб, дарҳол ижро ҳаракатларига киришилган.Ижро ҳаракатлари давомида собиқ ходим ижро ҳужжатида белгиланган тартибда Бухоро шаҳридаги таниқли университетга тьютор вазифасига ишга тикланган.Бироқ, собиқ ходим фойдасига иш ҳақи ва маънавий зарар ундириш тўғрисидаги ижро ҳужжати ижроси пайсалга солинган.Шундан сўнг, мажбурий ижро ҳаракатларига киришилиб, университет ҳисоб рақамига банд солиниб, мол-мулкларга ва автотранспорт воситаларига тақиқ ўрнатилган.
Шунингдек, ижро ҳаракатлари давомида автотранспорт воситаларига қидирув эълон қилиниб, университетга тегишли 5 та автомашина вақтинча сақлаш учун жарима майдончасига жойлаштирилган.
Шундан кейингина қарздор университет суд қарорини бажаришга мажбур бўлиб, ижро ҳужжатида белгиланган иш ҳақи ва маънавий зарар пулларни тўлиқ тўлаб берган ва ижро ҳужжати амалда тамомланган.
