Бурсада 25 мамлакат спортчиларини жамлайдиган халқаро тоғь ультрамарафони ўтказилади

 

Туркиянинг тарихий ва сайёҳлик марказларидан бири бўлган Бурса шаҳри 17–19 июль кунлари 9-Uludağ Premium Ultra Trail халқаро тоғь ультрамарафонига мезбонлик қилади. Улудоғ тоғи бағрида ташкил этиладиган мусобақада дунёнинг 25 мамлакатидан қарийб 3 минг нафар профессионал ва ҳаваскор югурувчи иштирок этиши кутилмоқда.

 

«Истанбулдан атиги икки соат, Бурса марказидан эса 30 дақиқалик масофада жойлашган мусобақа бу йил “Улудоғда югуриш орзуси!” шиори остида ўтказилади. Мусобақада Туркия билан бир қаторда Германия, Буюк Британия, АҚШ, Канада, Франция, Польша, Швеция, Эрон, Грузия, Швейцария, Бельгия, Нидерландия, Руминия, Норвегия ва бошқа давлатлардан спортчилар қатнашади.

 

       

 

Марафон йўналишлари Бурсанинг энг машҳур табиий ва тарихий масканлари орқали ўтади. Иштирокчилар ЮНЕСКОнинг Бутунжаҳон мероси рўйхатига киритилган Жумалиқизиқ қишлоғи, Саитабат шаршараси, Зейнилер қишлоғи, Музлик кўллари ҳамда 2 543 метр баландликдаги Улудоғ чўққисини ўз ичига олган мураккаб тоғ йўлакларида куч синашади.

 

         

 

Мусобақа турли тайёргарлик даражасидаги иштирокчилар учун бешта масофада ташкил этилади:

• UPUT 70K — 70 км, 3 600 метр баландликка кўтарилиш;

• UPM 42K — 42 км, 2 353 метр баландликка кўтарилиш;

• UPE 30K — 30 км, 1 510 метр баландликка кўтарилиш;

• UP16K — 16 км, 500 метр баландликка кўтарилиш;

• UP6K — 6 км, 210 метр баландликка кўтарилиш.

 

Бу йил янгиланган 70 километрлик йўналиш илк бор спортчиларни Улудоғ чўққисига олиб чиқади. 42 километрлик марафон иштирокчилари эса тоғнинг кичик чўққиси ҳудудида баҳс олиб боради. Мусобақа доирасида болалар югуриши ҳам ташкил этилиб, тадбирга байрамона муҳит бағишлайди.

 

       

 

Бурса нафақат спорт, балки тарих, табиат ва гастрономия уйғунлашган маскан сифатида ҳам машҳур. Шаҳардаги Улу жоме масжиди, Яшил масжид ва мақбараси, Кўза Хон карвонсаройи, тарихий бозорлар, Отатурк уй-музейи ҳамда қадимий Жумалиқизиқ қишлоғи сайёҳларнинг асосий диққат марказларидан ҳисобланади.

 

       

 

Улудоғ миллий боғи биологик хилма-хиллиги билан ҳам ажралиб туради. Ҳудудда 791 турдаги ўсимлик мавжуд бўлиб, уларнинг 108 таси эндемик ҳисобланади. Шунингдек, йўқолиб кетиш хавфи остидаги ўсимликлар ва ноёб капалак турлари ҳам айнан шу ҳудудда учрайди.

 

       

 

Бурса Искандар кабоби, каштан ширинлиги, таҳинли пиде, Гемлик зайтуни ҳамда ипак маҳсулотлари билан ҳам дунёга машҳур гастрономик ва маданий марказ саналади.