I Халқаро ислом цивилизацияси форуми якунида Декларация қабул қилинди

 

Тошкент шаҳрида ўтказилган “I Халқаро ислом цивилизацияси форуми: Тинчлик, бағрикенглик ва илм-маърифат йўли” якунида форум иштирокчилари Декларацияни қабул қилди.

 

Ҳужжатда ислом цивилизациясининг бой илмий ва маданий меросини асраш, чуқур ўрганиш ҳамда уни халқаро миқёсда кенг тарғиб этишга қаратилган қатор муҳим глобал ташаббуслар илгари сурилди.

 

Хусусан, Декларацияда Ўзбекистондаги Ислом цивилизацияси маркази ҳузурида халқаро ташкилотлар, академик ва илмий муассасалар, музейлар, кутубхоналар, архивлар, қўлёзмалар марказлари, тадқиқот институтлари ҳамда бошқа манфаатдор тузилмаларни бирлаштирувчи Жаҳон ислом цивилизацияси альянсини ташкил этиш таклиф қилинди.

 

Шунингдек, ислом цивилизацияси меросига оид тарихий манбаларни ягона платформада жамлайдиган Ислом цивилизацияси меросининг жаҳон рақамли реестрини яратиш, “Ислом цивилизацияси — бутун инсоният мероси” халқаро дастурини амалга ошириш, Халқаро ислом цивилизацияси мукофотини таъсис этиш, Жаҳон рақамли кутубхонасини шакллантириш ҳамда Ислом цивилизацияси бўйича халқаро ёшлар форумини мунтазам ўтказиш ташаббуслари илгари сурилди.

 

Қайд этилишича, мазкур ташаббуслар ислом цивилизациясининг инсонпарварлик, маърифат ва бағрикенгликка асосланган бебаҳо меросини асраш, илмий жиҳатдан тадқиқ этиш ва кенг жамоатчиликка етказишга хизмат қилади.

 

Таъкидланишича, Ўзбекистонда Ислом цивилизацияси марказининг ташкил этилиши ҳамда I Халқаро ислом цивилизацияси форумининг ўтказилиши ислом цивилизацияси меросини ўрганиш, асраш ва оммалаштириш йўналишидаги халқаро ҳамкорликни янги босқичга олиб чиқадиган муҳим қадам бўлди.