“Қўқон ҳолваси” географик кўрсаткич сифатида давлат рўйхатидан ўтказилди
Рўйхатдан ўтказиш ҳолванинг ўзига хослиги ва сифатини сақлаш ҳамда миллий бренд сифатида ривожлантиришга хизмат қилади.
Фарғона вилоятининг миллий ширинликларидан бири бўлган “Қўқон ҳолваси” географик кўрсаткич сифатида давлат рўйхатидан ўтказилди.
Адлия вазирлигининг маълум қилишича, тарихий манбаларга кўра, Қўқон шаҳри қадимдан ҳунармандчилик ва миллий қандолатчилик ривожланган масканлардан бири бўлиб, айнан шу ҳудудда тайёрланадиган Қўқон ҳолваси ўзининг анъанавий рецепти, тайёрлаш технологияси, таъми ва сифати билан нафақат Ўзбекистонда, балки хорижда ҳам эътироф этилган.
Маҳсулотнинг географик кўрсаткич сифатида давлат рўйхатидан ўтказилиши унинг номи ҳамда анъанавий тайёрлаш усулининг ҳуқуқий ҳимоясини таъминлайди. Шунингдек, бу маҳсулотнинг ўзига хос хусусиятлари ва сифат стандартларини сақлаш, қалбакилаштиришнинг олдини олиш ҳамда истеъмолчилар ишончини мустаҳкамлашга хизмат қилади.
Мутахассисларнинг таъкидлашича, ушбу рўйхатдан ўтказиш Фарғона вилоятининг гастрономик меросини асраш, ҳудуднинг миллий брендини ривожлантириш ва уни халқаро миқёсда кенг тарғиб этишда муҳим қадам ҳисобланади.
Маълумот учун, географик кўрсаткич — маҳсулотнинг муайян ҳудудга мансублиги ҳамда унинг сифати, обрўси ва ўзига хос хусусиятлари айнан ўша ҳудуднинг табиий-иқлимий ва ижтимоий-маданий омиллари билан чамбарчас боғлиқлигини тасдиқловчи интеллектуал мулк объекти саналади.
