Қорақалпоғистонда солиқ қарзлари мажбурий ундирилмоқда
Биргина Қонликўл туманида жорий йилнинг ўтган даврида солиқ қарздорлигини ундиришга оид жами 17 млрд 766 млн сўмлик 487 та ижро ҳужжатларининг ижроси таъминланган.
Мажбурий ижро бюроси Қонликўл туман бўлимлари томонидан солиқ қарздорликларини ундириш борасида бир қатор ишлар амалга оширилмоқда.
Хусусан, бўлим томонидан туман солиқ инспекцияси билан ҳамкорликда ишчи-гуруҳлар тузилган бўлиб, улар жисмоний ва юридик шахсларнинг солиқ қарздорликларини ундириш, шу орқали давлат бюджетига пул йўналтириш ишларини асосий вазифа қилиб қўйишган.
Таҳлилларга кўра, жорий йилнинг ўтган даврида, солиқ қарздорлигини ундиришга оид жами 17 млрд 766 млн сўмлик 487 та ижро ҳужжатларининг ижроси таъминланиб, шундан амалда 6 млрд 431 млн сўм ундирилган.
Қолдиқда бўлган 14 млрд сўмлик 610 та ижро ҳужжатлари ижросини таъминлаш мақсадида ундирув қарздорларнинг мол-мулкларига ва иш ҳақларига қаратилмоқда.
Масалан, бўлим иш юритувидаги қарздор "AGROHAMKOR CLUSTER" МЧЖнинг 1 млрд сўмдан ортиқ солиқ қарзи бўйича унга тегишли барча кўчмас мулклар тегишли тартибда хатловга олинган.
Қарздорларга юзага келган солиқ қарзи бартараф этилмаса, хатланган мулклар аукцион савдосига чиқарилиши ҳақида огоҳлантиришлар берилган.
