Парагвай сенатори Мбаппега яна таҳдид қилди
Аввалроқ Селесте Амарилла футболчининг ташқи кўриниши ва келиб чиқишига оид камситувчи ибораларни ишлатиб пост ёзган эди.
Франция терма жамоаси ҳужумчиси Кйлиан Мбаппе ва Парагвай сенатори Селесте Амарилла ўртасидаги можаро янада кескинлашди. Ирқчилик мазмунидаги баёнотлари учун халқаро танқидларга учраган сенатор бу сафар Мбаппега нисбатан судга мурожаат қилиши мумкинлигини айтиб, уни Парагвайни «менсимаслик»дан огоҳлантирди.
Амарилла ўзининг навбатдаги мурожаатини Х (собиқ Twitter) ижтимоий тармоғида француз ва испан тилларида эълон қилди. У Мбаппени "гендер зўравонлик" қилганликда айблаб, футболчи ундан узр сўрамаса ёки аввалги баёнотини рад этмаса, судга мурожаат қилишини билдирди.
Шунингдек, сенатор Мбаппега мурожаат қилиб, "Парагвайликлар билан муносабат қилишда эҳтиёт бўл. Бу ерда Роналдинёни ҳам қамашган” дея изоҳ қолдирган.
Бу гап билан Амарилла 2020 йилда бразилиялик футбол афсонаси Роналдинё ва унинг акаси Роберто Ассиснинг Парагвайга қалбаки паспорт билан киргани учун қамоққа олиниб, бир неча ой уй қамоғида сақланган воқеани назарда тутган.
Бундан аввал Мбаппе Франциянинг Жаҳон чемпионати нимчорак финалида Парагвайни 1:0 ҳисобида мағлуб этган учрашувдан сўнг Амарилланинг ирқчилик мазмунидаги постларига жавоб қайтарган эди.
"Сиз жирканч аёлсиз ва эгаллаб турган лавозимингизга лойиқ эмассиз. Сизнинг очиқ ирқчилигингиз сабаб бутун дунё Парагвай терма жамоасининг тарихий ўйинини эмас, айнан сизни муҳокама қилмоқда", деб ёзганди Мбаппе.
Шундан сўнг Франция футбол федерацияси сенаторнинг баёнотлари юзасидан Париж прокуратурасига шикоят киритган. Франция прокуратураси Амариллага нисбатан ирқчилик ва нафрат қўзғатишга оид моддалар бўйича терговни бошлаган. Франция қонунчилигига кўра, бундай жиноятлар бир йилгача озодликдан маҳрум қилиш ва 45 минг еврогача жарима билан жазоланиши мумкин.
Парагвай ҳукумати эса сенаторнинг баёнотлари мамлакатнинг расмий позициясини акс эттирмаслигини билдириб, ирқчилик ва камситишнинг ҳар қандай кўринишини қоралаган. Франция президенти Эммануэл Макрон ҳам Мбаппени қўллаб-қувватлаган ва унинг ирқчиликка қарши позициясини олқишлаган.
